Да 70 рублёў за прыём: колькі на самой справе каштуе бюджэтная медыцына ў Беларусі

У Беларусі «бясплатная» медыцына мае цалкам канкрэтны кошт для бюджэту. Пра гэта расказаў старшыня камітэта па ахове здароўя Мінгарвыканкама Юрый Горбіч у эфіры праграмы «Говорит и показывает Минск».

Чытайце таксама: «Трапіць да неўролага — як у фантастыцы»: Жыхарка Бярозы раскрытыкавала працу мясцовай паліклінікі

Паводле яго слоў, кожны візіт да ўрача ўключае ў сябе не толькі працу спецыяліста, але і выдаткі на абсталяванне, яго абслугоўванне і заробкі персаналу. У выніку прыём у тэрапеўта абыходзіцца прыкладна ў 45 рублёў, у педыятра — каля 40, а візіт да стаматолага можа дасягаць ужо амаль 70 рублёў.

Колькі каштуе хуткая і лячэнне ў стацыянары

Яшчэ большыя сумы ідуць на экстраныя выпадкі і стацыянарнае лячэнне. Адзін выезд хуткай дапамогі ў 2025 годзе каштаваў дзяржаве каля 245 рублёў.

Лячэнне ў бальніцы абыходзіцца яшчэ даражэй. Адзін дзень у звычайным аддзяленні каштуе прыкладна 430 рублёў, а ў рэанімацыі — да 1700 рублёў за суткі. І гэта без уліку дарагіх лекаў, якія могуць істотна павялічыць агульныя выдаткі.

У выніку за паняццем «бясплатная медыцына» стаяць мільярдныя выдаткі. Усяго за 2025 год на ахову здароўя было накіравана каля 13 мільярдаў рублёў, з якіх каля пятай часткі пайшла на забеспячэнне стацыянараў лекамі.

Дыспансерызацыя і ранняя дыягностыка

Асобная ўвага надаецца прафілактыцы і ранняму выяўленню захворванняў. З 2025 года акцэнт зроблены на хваробы сэрца, эндакрыннай сістэмы і анкалагічныя рызыкі.

Паводле афіцыйных дадзеных, гэта ўжо дало вынікі: на ранняй стадыі выяўляецца больш за 99% выпадкаў рака шыйкі маткі, каля 85% — рака малочнай залозы і 84% — рака прадсталёвай залозы.

Пры гэтым і дыспансерызацыя таксама патрабуе сродкаў. Для людзей ва ўзросце ад 18 да 39 гадоў абследаванне праводзіцца раз на тры гады і каштуе каля 59 рублёў для мужчын і 73 рублі для жанчын. Пасля 40 гадоў яго неабходна праходзіць штогод, і кошт крыху павялічваецца.

Чаму людзі ўсё роўна незадаволены

Нягледзячы на значныя фінансавыя ўкладанні, беларусы працягваюць скардзіцца на працу сістэмы. Напрыклад, жыхарка Бярозы расказала ў TikTok пра складанасці з запісам да ўрачоў у мясцовай паліклініцы. Паводле яе слоў, маладыя спецыялісты пасля абавязковай адпрацоўкі часта звальняюцца, што прыводзіць да дэфіцыту кадраў.

У выніку ўрачы, якія застаюцца, працуюць з вялікай нагрузкай, што адбіваецца на якасці і даступнасці медыцынскай дапамогі. У рэгіёнах таксама часта ўзнікаюць чэргі нават на базавыя працэдуры, такія як здача аналізаў.

Дадатковыя цяжкасці ўзнікаюць праз закрыццё радзільных аддзяленняў у шэрагу раённых цэнтраў. Пацыентам, у тым ліку будучым маці, даводзіцца ездзіць у іншыя гарады, часам за дзясяткі і сотні кіламетраў.

Праблемы з чэргамі перыядычна ўзнікаюць і ў Мінску, аднак менавіта сталіца застаецца асноўным месцам, куды імкнуцца маладыя спецыялісты. Гэта яшчэ больш узмацняе разрыў паміж цэнтрам і рэгіёнамі.

Крытыка гучыць і знутры іншых абласных цэнтраў. Жыхар Магілёва Аляксей Таранаў лічыць, што сістэма патрабуе сур’ёзных зменаў. Ён сцвярджае, што праблемы закранаюць усё — ад абсталявання да забеспячэння медыкаментамі. У якасці прыкладу ён прыводзіць сітуацыю, калі ў адной з паліклінік не знайшлося нават базавых сродкаў, такіх як нашатырны спір, і медыкам даводзілася шукаць яго па ўсім будынку. Таксама ён звяртае ўвагу на стан аўтамабіляў хуткай дапамогі і недахоп спецыялістаў у невялікіх населеных пунктах.

На сёння беларуская медыцына застаецца сферай з вялікімі бюджэтнымі выдаткамі і адначасова — з шэрагам сістэмных праблем. З аднаго боку, дзяржава ўкладвае мільярды і дэманструе поспехі ў ранняй дыягностыцы, з другога — пацыенты, што жывуць у рэгіёнах краіны, працягваюць сутыкацца з чэргамі, дэфіцытам кадраў і не заўсёды даступнай дапамогай.

Чытайце таксама: Слуцкі радзільны дом усё ж закрылі. Цяжарных з усяго раёна адвозяць у іншыя гарады