Міністр адукацыі папракнуў бацькоў школьнікаў за выкарыстанне планшэтаў

З першага верасня гэтага года ў беларускіх школах дзейнічае забарона на выкарыстанне мабільных тэлефонаў.  Згодна з пастановай Мінадукацыі, гэтая забарона не распаўсюджваецца на выкарыстанне смарт-гадзіннікаў.

Выкарыстанне планшэтаў (без гульняў і доступу ў інтэрнэт) дазваляецца па стане здароўя — калі дзіця, напрыклад, не можа фізічна насіць падручнікі. Бацькі школьнікаў, хвалюючыся за здароўе дзяцей і цяжкія заплечнікі, вага якіх перавышае санітарную норму ў 2,5 кг, часта даюць ім у школу планшэты з электроннымі падручнікамі замест «цагляных» кніг.

Чытайце таксама: Жанчына паказала, колькі важыць школьны заплечнік. Вынік здзівіў многіх

Паводле новай пастановы, дазвол на выкарыстанне планшэтаў рэгулюецца на ўзроўні адміністрацыі школы. У адных школах дзецям дазваляюць карыстацца планшэтамі, у іншых — не.

Пасля таго як бацькі пачалі масава скардзіцца на вялікую вагу заплечнікаў, міністр адукацыі Андрэй Іванец зрабіў нечаканую заяву на прэс-канферэнцыі, прызначанай да Дня настаўніка. Чыноўнік заклікаў бацькоў больш уважліва ставіцца да здароўя вучняў і папракнуў іх у тым, што яны робяць гэта недастаткова.

Паводле словаў Іванца, выкарыстанне планшэтаў замест падручнікаў нашмат больш шкоднае, чым цяжкія заплечнікі, якія нават не адпавядаюць санітарным нормам: «Калі бацькі вельмі моцна турбуюцца пра цяжкія заплечнікі сваіх школьнікаў, то яны павінны не забываць пра тое, што 6–7 урокаў сядзець у планшэце, у электроннай кнізе для зроку можа быць нашмат шкодней, чым партфель з падручнікамі прынесці і панесці са школы».

На думку міністра, час, праведзены за планшэтамі, не адпавядае санітарным нормам. Аднак Іванец праігнараваў скаргі бацькоў на перавышэнні санітарных нормаў вагі школьных ранцах.

Калі на канферэнцыі ў чыноўнікаў спыталі пра магчымасць школьнікам насіць з сабой падручнікі на пару з суседам па парце, каб пазбегнуць нашэння цяжкасцяў, старшыня камітэта па адукацыі Мiнгарвыканкама Марына Ільіна адзначыла, што гэта не будзе забаронена, і што многія дзеці ўжо так робяць.

Чытайце таксама: «Дебил, что ли?» В Слуцке учительница оскорбила школьника и угрожала его матери