«Проста плачу, не магу спыніцца»: Жыхары Мінска б’юць трывогу праз вырубку дрэваў

Мінчане ўсё часцей пераймаюцца за стан зялёных насаджэнняў у сваім горадзе. Апошняй нагодай для хвалявання людезй стала сітуацыя з вырубкай кустоў і дрэваў на вуліцы Чычурына.

Чытайце таксама: У Гродне скардзяцца на рэканструкцыю сквера на Дарвіна

Жыхарка сталіцы апублікавала пост у Threads, у якім паказала, што адбылося з садам на Чычурына. У сваім допісе яна не стрымала эмоцый: «Я проста, вось у шоку без слоў. Слёзы цякуць ракой, а вакол заліваюцца салаўі. Для мяне гэта заўжды страта, ну як так, навошта. Я проста плачу, не магу спыніцца», — дзеліцца яна.

 

View on Threads

 

На кадрах, апублікаваных беларускай, відаць паваленыя на зямлю кусты дрэваў, а таксама парадзелы сад. Для параўнання жанчына дадала і іншыя кадры, на якіх можна заўважыць, як месца выглядала раней — з пышнымі яблынямі і каштанамі, што радавалі вока жыхароў яшчэ напачатку вясны.

Як адзначаюць мінчане, у гэтым месцы запланавана будоўля новага мікрараёна. Аднак у многіх людзей узнікаюць пытанні, чаму тое адбываецца на шкоду зялёным зонам.

У сетцы кожны ваш клік пакідае след, які могуць выкарыстаць супраць вас. Не дазваляйце нікому ператвараць вашыя інтарэсы ў крымінальныя справы. Уключайце BGlobal VPN — заставайцеся нябачнымі для старонніх вачэй.

Спасылка на падключэнне BGlobal VPN — тут

Чаму гэта турбуе мінчан?

Аўтарка допісу адзначыла, што праблема з вырубкай дрэваў тычыцца як і прыгажосці раёна, так і захавання біяразнастайнасці. Так, яна прывяла ў прыклад тых жывёлаў, што пражывалі на тэрыторыі сада: «Тут я зайца раніцай бачыла месяц таму і курапаткі раней бегалі зграямі».

Іншыя людзі ў каментарах пад публікацыяй мінчанкі звярнулі ўвагу на тое, што вырубка адбылася не ў адпаведнасці з правіламі — падчас перыяда гнездавання птушак. Таксама людзі выказваюць занепакоенасць наконт жыццяў як саміх дрэваў, так розных відаў, што насялялі зялёную зону на Чычурына. Хтосьці нават згадвае народныя павер’і, паводле якіх знішчаць дрэвы ў часы цвіцення — дрэнная прыкмета.

• «Як жа бяздумна знішчаецца ўсё жывое… Па ўсёй бачнасці, гэтым яблыням не менш за 30 гадоў, але былі ж здаровыя дрэвы. Хутчэй за ўсё ў планах будаўніцтва».
• «Гэта называецца старэчы маразм. Калі лобныя звіліны далі зваротны адлік».
• «Гэта вельмі дрэнна — зрэзаць сад падчас цвіцення. Нельга секчы дрэва ў колеры — паміраць будуць маладыя людзі, што тут жыць будуць».
• «Так усё больш нерухомасці скупляецца расейцамі, а ім пофігу на зялёныя зоны».

Агульная праблема для Беларусі

Падобныя канфлікты вакол зялёных насаджэнняў узнікаюць у Беларусі рэгулярна. У Мінску жыхары неаднаразова спрачаліся з камунальнікамі праз вырубку дрэваў у дварах, лесапаркавых зонах і кварталах новай забудовы. Асабліва шырока абмяркоўвалі сітуацыі ў Мядзвежына і Калодзішчах — у апошнім выпадку людзі нават стварылі петыцыю, каб паспрабаваць захаваць зялёныя тэрыторыі.

Падобныя гісторыі адбываюцца і ў рэгіёнах. Так, жыхары вёскі Вольна ў Баранавіцкім раёне паведамілі пра спілоўванне старых дрэваў каля барочнай царквы. Паводле допісаў беларусаў у Threads, гаворка ішла пра тэрыторыю былога парку роду Слізняў, якую многія ўспрымалі як частку гістарычнага і прыроднага ландшафту.

У Гомелі мясцовыя жыхары таксама не раз звярталі ўвагу на знос дрэваў у цэнтры горада і скверах. Людзі скардзіліся, што пасля такіх работ гарадская прастора становіцца менш утульнай, губляе цень і звыклы выгляд.

Гучала гэтая тэма і ў Брэсце. Там абмеркаванне выклікалі вырубкі каля Брэсцкай крэпасці і маштабныя добраўпарадкаванні перад візітамі высокапастаўленых чыноўнікаў, якія частка гараджан успрымала як пашкоджанне важнага гарадскога асяроддзя.

Чытайце таксама: У Віцебску на вуліцы Герцэна спілавалі дрэвы. «Віцебскэнерга» адказала, што гэта дзеля цяпла ў кватэрах зімой