Чаму на Магілёўшчыне тэхніку даюць толькі «разумным», а астатнім – лыжку і абед?

Чыноўнікі знайшлі незвычайны спосаб зняць кадравую напружанасць у сельскай гаспадарцы: падзялілі работнікаў на «разумных» і «не вельмі». Першыя цяпер могуць кіраваць сучаснай тэхнікай, а другія — забяспечваць першых харчаваннем, жыллём і ўсім, што не патрабуе націску кнопак і разумення ў прыборах.

Чытайце таксама: «Усё пад кантролем». Праўладныя медыя адмаўляюць чэргі ў капыльскай бальніцы

Прычынай такіх пераменаў стала чарговае выказванне Лукашэнкі пра тое, што «на месцах не ўмеюць абыходзіцца з тэхнікай». У збяднелых рэгіёнах ягоныя словы ўспрынялі не як крытыку, а як непасрэдны загад: не давяраць тэхніку мясцовым, а перадаць яе ў цэнтралізаваныя механізаваныя атрады. І трэба сказаць — выканалі хутка, як у добрым войску, заўважае Магілёў.media.

У выніку на Магілёўшчыне быццам бы вырашылі ўсё адразу:

• кадравую праблему ў ААТ «Прывольны агра»;
• кадравыя пытанні на вёсцы;
• наладзілі лагістыку і дысцыпліну, якія «забяспечваюць рэнтабельнасць ураджаю».

Нягледзячы на прыгожыя фармулёўкі, сутнасць простая: землі мясцовых гаспадарак перадаюцца мехатрадам, якія становяцца паўнапраўнымі гаспадарамі ўраджаю і, натуральна, багацеюць за кошт гаспадарак, што іх утрымліваюць.

Аргумент жа чыноўнікаў жалезны: на сучаснай тэхніцы павінны працаваць «прасунутыя механізатары ўзроўню інжынера». Праўда, сярод мясцовых такіх, відаць, не знайшлося. Улады фактычна прызналі, што навучыць механізатараў Магілёўшчыны, Віцебшчыны і Гомельшчыны — задача нерэальная.

Але без працы ніхто не застаўся. Работнікам сельгаспрадпрыемстваў таксама знайшлі «годны занятак», адпаведны іх «сціплым здольнасцям»: яны цяпер павінны карміць, забяспечваць абедамі і палівам, аплочваць працу тых самых шчасліўчыкаў з мехатрадаў, якіх палічылі «разумнымі».

Вось так у рэгіёне хутка і без спрэчак выканалі ўказанне зверху: кожнаму — па здольнасцях, па лініі начальства: разумным — трактары, астатнім — сталовая.

Чытайце таксама: У Любанскім раёне ў вядомай сельгаспадарцы кароваў трымалі ў брудзе