Чаму ў Дзяржынску знайшлі 574 тысячы рублёў на помнік беларускай жанчыне, але не на захаванне царквы XIX стагоддзя?

У Дзяржынску рыхтуюць да ўстаноўкі новы манумент, прысвечаны беларускай жанчыне. Трохметровая скульптура з бронзы павінна з’явіцца каля будынка райвыканкама да абласных Дажынак. На яе стварэнне плануюць выдаткаваць амаль 574 тысячы беларускіх рублёў — гэта каля 120 тысяч долараў.

Чытайце таксама: У Дзяржынскім раёне хочуць знесці руіны храма XIX стагоддзя. Чыноўнікі не бачаць у гэтым праблемы

Пра будучы помнік распавялі ў эфіры «Беларусь 1». На гэта звярнуў увагу Telegram-канал беларускіх архітэктараў «Спадчына».

«Год беларускай жанчыны — у бронзе»

На дзяржаўным тэлебачанні праект прэзентавалі ў кантэксце Года беларускай жанчыны.

«Зусім хутка ў Дзяржынску з’явіцца новы знакавы манумент. Трохметровая скульптура, якая сімвалізуе прыгажосць, будзе ўстаноўлена каля будынка раённага выканаўчага камітэта», — распавялі ў эфіры.

Эскіз скульптуры ўжо гатовы, а яе прапорцыі спачатку вывялі ў мяккім матэрыяле. Цяпер майстры здымаюць форму, пасля чаго манумент плануюць адліць у бронзе.

На стварэнне скульптуры з раённага бюджэту прадугледжана амаль 574 тысячы рублёў.

У гэтым жа раёне хочуць знесці царкву XIX стагоддзя

На кантрасце з вялікімі выдаткамі на новы манумент «Спадчына» раней звяртала ўвагу на іншы аб’ект у Дзяржынскім раёне — руіны гістарычнага храма Святых Пятра і Паўла ў вёсцы Старынкі.

Мураваную царкву, узведзеную ў XIX стагоддзі, мясцовыя ўлады прапанавалі прадаць на аўкцыёне. Пры гэтым для будучага ўладальніка прадугледзелі абавязковую ўмову — цалкам знесці будынак на працягу года.

Раней з гэтай нагоды быў пададзены зварот з патрабаваннем адмяніць аўкцыён.

Мінскі аблвыканкам у адказе патлумачыў, што храм ніколі не ўваходзіў у Дзяржаўны спіс гісторыка-культурных каштоўнасцей. Таму, паводле чыноўнікаў, на яго не распаўсюджваюцца адпаведныя ахоўныя патрабаванні.

Пры гэтым будынак згадваецца ў савецкім «Зборы помнікаў гісторыі і культуры» 1987 года. Аднак аблвыканкам лічыць гэтае выданне навукова-папулярным і сцвярджае, што яно не мае юрыдычнай сілы.

Храм могуць страціць праз тэхнічны стан

Асноўнай прычынай для зносу ўлады называюць аварыйны стан будынка.

У аблвыканкаме спасылаюцца на тэхнічнае заключэнне ТАА «Белжыллё». Паводле яго, не менш за 20% апорных канструкцый знаходзяцца ў крытычным, IV катэгорыі тэхнічнага стану. Гэта, як адзначаецца ў дакуменце, стварае пагрозу абрушэння.

Менавіта таму продаж будынка з умовай абавязковага дэмантажу ўлады называюць спосабам ліквідацыі небяспекі.

Пры гэтым у адказе аблвыканкама таксама сцвярджаецца, што падстаў для надання храму статусу гісторыка-культурнай каштоўнасці няма.

У выніку ў адным і тым жа Дзяржынскім раёне на стварэнне новага трохметровага бронзавага помніка беларускай жанчыне плануюць выдаткаваць сотні тысяч рублёў, у той час як гістарычны будынак XIX стагоддзя ў Старынках можа быць страчаны.

І ўсё гэта адбываецца напярэдадні абласных Дажынак, якія сёлета прыме Дзяржынск.

Чытайце таксама: У Рагачове адкрылі новы вайсковы помнік, але пастамент пачаў разбурацца ўжо падчас цырымоніі