Прапагандыста зрабілі яшчэ і паэтам — лаўрэатам «Лепшага дэбюту»

З 6 па 7 верасня ў Лідзе праходзіць свята Дня беларускай пісьменнасці. Сёлета асноўныя тэмы: «80-годдзе Вялікай Перамогі», «Год Добраўпарадкавання», 500 год з першай публікацыі кнігі «Апостал» Францыска Скарыны і юбілейныя даты беларускіх класікаў.

Чытайце таксама: «Белая Вежа»: як адна з пастаноўшчыц фестываля звязана з «расейскім светам»

У першы дзень былі абвешчаны лаўрэаты Нацыянальнай літаратурнай прэміі. Большасць пераможцаў ўжо доўгі час выдаюць свае кнігі і так ці інакш звязаныя з літаратурай. Былі і тыя, хто публікаваўся ўпершыню. У іх узнагародах не было нічога незвычайнага. Але сапраўдным «сюрпрызам» стала намінацыя «Лепшы дэбют», якая дасталася Вадзіму Баравіку, вядомаму прапагандысту і дэпутату Мінскага гарсавета. Таму самаму, што ў 2020 годзе быў даверанай асобай Лукашэнкі. Прэмію ён атрымаў за паэтычны зборнік «Иду по Минску», выдадзены домам «Звязда».

«У паэтычную складанку Вадзіма Баравіка ўвайшлі вершы розных гадоў на рускай і беларускай мовах, якія ўключаюць любоўную, філасофскую, грамадзянскую і пейзажную лірыку. Кніга рэкамендуецца шырокаму колу чытачоў», —такое апісанне кнігі на беларускім маркетплэйсе oz.by.

Чым жа вядомы Вадзім Баравік? На дзяржаўным тэлебачанні ён дэманструе свой «шматбаковы профіль», прадстаўляючы сябе як палітычнага аналітыка, дэпутата і прадпрымальніка. Што да апошняга — тут сітуацыя больш цікавая. Пошук у дзяржаўных рэестрах паказаў, што ў 1997 годзе ён сапраўды зарэгістраваў індывідуальнае прадпрыемства, але ў 2021 годзе яно было выключана з ЕГР. Іншымі словамі, ранейшы статус прадпрымальніка, хутчэй за ўсё, патрэбны для прыгожага радка на тэлебачанні.

У прамых эфірах Вадзім часта каментуе геапалітычныя пытанні, дзе заяўляе пра «канец Калектыўнага Захаду» і падкрэслівае важнасць супрацоўніцтва Беларусі з Кітаем. Акрамя таго, ён удзельнічаў у праграмах канала саюзнай дзяржавы Беларусі і Расіі «БелРос», дзе выступаў у падтрымку дзеянняў рэжыму Лукашэнкі.

Яшчэ ў 2017 годзе ён публікаваў матэрыялы для расійскага прапагандысцкага рэсурсу СОНАР2050, дзе сцвярджаў пра небяспеку адукацыйных праектаў у Беларусі, што фінансуюцца інстытуцыямі ЕС, нібыта яны могуць прывесці да рэвалюцыі, падобнай да ўкраінскай.

Чытайце таксама: В Хойниках с помпой открыли бассейн. И сразу же закрыли

Пры гэтым да 2020 года Баравік часта наведваў розныя краіны ЕС і дзяліўся гэтым на сваёй старонцы ў Instagram. У той жа час ён сцвярджае, што развал Еўразвязу і слабая Еўропа невыгадныя для Беларусі, бо гэтым скарыстаецца ЗША. Падчас прамога эфіру СТВ ён заявіў, што на тэрыторыі Беларусі «ідзе вайна» (размова ішла пра вайну Расеі супраць Украіны) — даволі смелае выказванне для прапагандыста.

У ягоных выказваннях шмат супярэчанняў, але нязменна адно — падтрымка Лукашэнкі. Цяпер да трох ранейшых роляў для ТБ — «палітычнага аналітыка, дэпутата і прадпрымальніка» — яшчэ дадаецца і «паэт».