«Патэлефанавалі з РАУС і сказалі: віншуем, ты дармаед». Садавод з Дзісны спрабуе даказаць, што ён працуе

Аўтар TikTok-блога пра садаводства «Дисна Дрэвы» расказаў, што яму патэлефанавалі з РАУС і паведамілі: яго лічаць «дармаедам». Пасля гэтага мужчына паехаў у сельсавет, узяў даведку пра тое, што вядзе падсобную ці садовую гаспадарку, і адвёз яе ў цэнтр занятасці. Цяпер, паводле ягоных слоў, дакумент павінна разгледзець камісія.

Чытайце таксама: «У першым квартале ў мяне быў нулявы даход». Гамяльчанін працягнуў гісторыю з павышанай камуналкай і «дармаедствам»

Мужчына атрымаў даведку аб наяўнасці гаспадаркі і перадаў яе ў раённы цэнтр

«Мне патэлефанавалі з РАУС і сказалі: віншуем, ты дармаед. Я як вясковы жыхар, які жыве ў вёсцы, зарэгістраваны ў вёсцы, сеў на матацыкл і паехаў у сельсавет даведацца, што ўвогуле з гэтым рабіць», — расказаў ён на відэа.

Мужчына кажа, што атрымаў даведку аб наяўнасці гаспадаркі і перадаў яе ў раённы цэнтр. Але канчатковага рашэння пакуль няма: «Чым гэта ўсё скончыцца, пакуль незразумела, таму што мне сказалі, што ўсё роўна гэта будзе разглядаць камісія».

У каментарах людзі пачалі абмяркоўваць, што значыць трапіць у базу «дармаедаў» для вясковага жыхара. Адны пытаюцца, якія паслугі могуць падаражэць у вёсцы. Іншыя нагадваюць, што і там ёсць святло, газ, вада, вываз смецця, а значыць, павышаныя тарыфы могуць ударыць не толькі па гараджанах.

У сетцы кожны ваш клік пакідае след, які могуць выкарыстоўваць супраць вас. Не дазваляйце ператвараць вашыя інтарэсы ў крымінальныя справы. Уключайце BGlobal VPN — будзьце нябачныя для старонніх вачэй.

Спасылка на падключэнне BGlobal VPN – тут

Даведка з сельсавета важная, але яшчэ не гарантуе аўтаматычнага выключэння з базы

З пункту гледжання заканадаўства сітуацыя мужчыны не выглядае безнадзейнай. У Беларусі людзі, якія вядуць асабістую падсобную гаспадарку, займаюцца агародніцтвам, вырабляюць прадукцыю раслінаводства або жывёлагадоўлі, а таксама вядуць сялянскую або фермерскую гаспадарку, могуць лічыцца занятымі ў эканоміцы. Але ёсць умовы: чалавек павінен быць зарэгістраваны па месцы жыхарства на тэрыторыі Беларусі, фактычна пражываць у краіне і не адсутнічаць за мяжой 30 і больш дзён у квартале, за які фармуецца база «дармаедаў».

Менавіта таму даведка з сельсавета ў такой сітуацыі важная, але сама па сабе яна яшчэ не гарантуе аўтаматычнага выключэння з базы. Камісія будзе глядзець, ці сапраўды чалавек вядзе гаспадарку, ці адпавядае ягоны ўчастак патрэбным крытэрыям, ці ёсць рэгістрацыя па месцы жыхарства і ці не было працяглай адсутнасці ў Беларусі. Падобныя тлумачэнні давалі і юрысты: фермер або ўладальнік гаспадаркі не павінен лічыцца «дармаедам», калі ён большую частку часу жыве ў Беларусі і адпавядае ўстаноўленым умовам.

Гэта значыць, мужчыну з відэа тэарэтычна могуць прызнаць занятым у эканоміцы, калі ягоная садовая або падсобная гаспадарка адпавядае патрабаванням. Але канчатковае рашэнне прымае камісія. Таму гісторыя пакуль застаецца адкрытай: чалавек працуе на зямлі, вырошчвае дрэвы, вядзе гаспадарку, але ўсё роўна вымушаны даказваць дзяржаве, што ён не «дармаед».

Чытайце таксама: «Вярнулася ўжо “дармаедкай”»: беларуска расказала, як пасля выезду за мяжу ёй налічылі павышаную камуналку