«У дзевяць гадоў на мяне павесілі доўг у 4,5 тысячы рублёў». Гісторыя мінчаніна выклікала спрэчкі ў Threads

Жыхар Мінска апублікаваў у Threads гісторыю, якая хутка набрала сотні рэакцый. Мужчына сцвярджае, што толькі ў 2025 годзе даведаўся: яшчэ ў дзяцінстве на яго быў аформлены судовы доўг у памеры каля 4,5 тысячы рублёў пасля смерці маці.

Чытайце таксама: «Я читаю эти зарплаты и мне хочется плакать»: беларуска спросила, сколько зарабатывают девушки в Бобруйске 

Пра доўг даведаўся толькі праз восем гадоў

Паводле аўтара допісу, у 2017 годзе памерла яго маці. На той момант у яе было два крэдыты.

Адзін, як ён сцвярджае, працягваў выплачваць айчым. Другі быў аформлены на мабільны тэлефон, якім карыстаўся зводны брат.

Мінчанін прызнаецца, што лічыў гэты крэдыт закрытым і нават не падазраваў пра запазычанасць. Аднак у чэрвені 2025 года на яго банкаўскай картцы нечакана з’явіўся мінус — каля 4458 рублёў.

«Паехаў да судовых выканаўцаў і даведаўся, што гэта якраз той самы доўг за тэлефон», — напісаў ён.

Пасля гэтага ён атрымаў копію судовага рашэння і, паводле яго слоў, быў яшчэ больш здзіўлены.

«Я даведаўся, што суд адбыўся ў 2019 годзе. На той момант мне было дзевяць гадоў. Суд прыняў рашэнне павесіць гэты доўг на мяне. Спачатку мне нават закрылі выезд з краіны, і я не мог карыстацца карткамі. Цяпер праз суд удалося зняць усе абмежаванні, бо мне ўжо споўнілася 18 гадоў. Я не адмаўляю, што доўг трэба было выплаціць. Але мяне мучыць пытанне: як можна было прысудзіць такі доўг дзевяцігадоваму дзіцяці?» — напісаў аўтар.

Да паведамлення ён прыклаў фатаграфію судовага рашэння. У ім пазначана, што з яго спаганяецца запазычанасць «у межах кошту спадчыннай маёмасці».

У каментарах параілі звяртацца ў пракуратуру

Многія карыстальнікі палічылі, што ў гэтай гісторыі неабходна разбірацца праваахоўным органам:

• «Першае, што трэба зрабіць, — звярнуцца ў пракуратуру. Няхай абараняюць правы непаўналетніх. Завочнае рашэнне можна і трэба адмяняць. Відавочна, што адказчыка ніхто належным чынам не апавясціў».

Іншыя нагадвалі, што ў справах, якія датычацца дзяцей, павінны ўдзельнічаць іх законныя прадстаўнікі:

• «У дзевяць гадоў чалавек у Беларусі яшчэ працэсуальна недзеяздольны. Калі закранаюцца інтарэсы непаўналетняга, у працэсе павінны ўдзельнічаць законны апякун і органы апекі. Пачынайце з пракуратуры».

Былі і тыя, хто параіў шукаць адваката:

«Каб успадкаваць даўгі ў Беларусі, спачатку трэба прыняць спадчыну. Спадзяюся, вам трапіцца добры юрыст».

Частка каментатараў адзначыла, што само па сабе спагнанне доўгу не супярэчыць заканадаўству.

• «Ніякага «дна» тут няма. Доўг спагнаны «ў межах кошту спадчыннай маёмасці», а гэта азначае, што спадчына была прынята. Прымаючы маёмасць, спадчыннік прымае і даўгі».

Сёння адзін клік ці падабайка могуць каштаваць занадта дорага. Гісторыя вашага браўзэра не павінна быць падставай для пераследу. BGlobal VPN. цалкам шыфруе ваш трафік. Заставайцеся ў бяспецы.

Спасылка на падключэнне BGlobal VPN – тут

Што пра гэта кажа закон

Беларускае заканадаўства сапраўды прадугледжвае, што разам са спадчынай могуць пераходзіць і даўгі памерлага.

Згодна з Грамадзянскім кодэксам, спадчыннікі адказваюць па абавязацельствах спадчынадаўцы толькі ў межах кошту атрыманай спадчыннай маёмасці. Гэта значыць, калі чалавек атрымаў спадчыну, крэдыторы могуць патрабаваць пагашэння запазычанасці, але не больш, чым каштуе атрыманае ад памерлага маёмасць.

Калі ж спадчыннікам з’яўляецца непаўналетні, ад яго імя ўсе юрыдычна значныя дзеянні здзяйсняюць законныя прадстаўнікі — бацькі, апекуны або папячыцелі. Пры разглядзе судовых спраў, якія закранаюць інтарэсы дзяцей, павінны выконвацца дадатковыя працэсуальныя гарантыі, а ў асобных выпадках да ўдзелу могуць прыцягвацца органы апекі і папячыцельства.

Гісторыя мінчаніна дагэтуль выклікае шмат пытанняў сярод беларускіх карыстальнікаў. Пакуль невядома, пры якіх абставінах была прынята спадчына, хто прадстаўляў інтарэсы дзіцяці ў судзе і ці былі выкананыя ўсе працэсуальныя патрабаванні.

Чытайце таксама: «Налицо несогласованность чиновников». Жительница Пуховичского района записала обращение к Лукашенко