Скарга маладой мамы з Маладзечна на талоны выклікала спрэчку, а паліклініка ўсё абвергла

Жыхарка Маладзечна паскардзілася ў Threads, што ўжо два месяцы не можа запісаць дзіця на абавязковую медкамісію. Паводле яе слоў, свабодных талонаў на сайце няма, датэлефанавацца ў рэгістратуру немагчыма, а некаторыя спецыялісты прымаюць толькі па талонах «дзень у дзень». Пасля публікацыі гісторыя выклікала актыўнае абмеркаванне, а затым на яе адрэагавалі раённыя СМІ і сама паліклініка.

Чытайце таксама: «Чтобы включили хотя бы вентиляторы». Жительница Столбцов пожаловалась на духоту и очереди в поликлинике

За два месяцы ў жанчыны атрымалася ўзяць толькі адзін талон

Аўтарка допісу расказала, што за два месяцы ў яе атрымалася ўзяць толькі адзін талон, які, як высветлілася пазней, быў у дарослую паліклініку. Яна таксама сцвярджае, што ў рэгістратуры ёй некалькі разоў казалі: да некаторых спецыялістаў запіс магчымы толькі ў дзень звароту.

Аднак у каментарыях меркаванні падзяліліся. Адны бацькі пацвердзілі, што трапіць да асобных урачоў сапраўды няпроста, асабліва летам, калі частка спецыялістаў знаходзіцца ў адпачынку. Некаторыя расказвалі, што запісваліся за некалькі месяцаў наперад або спецыяльна праходзілі медагляд раней, каб пазбегнуць чэргаў.

Іншыя, наадварот, пісалі, што асаблівых праблем не адчувалі. Паводле іх слоў, яны змаглі запісацца па тэлефоне або праз сайт адразу да некалькіх спецыялістаў, а свабодныя талоны былі даступныя нават на найбліжэйшыя тыдні. Аўтарка скаргі адказвала, што сітуацыя змянілася толькі нядаўна, тады як у чэрвені неабходных талонаў, паводле яе слоў, практычна не было.

Чытайце таксама: Блогерка паскардзілася на Полацкую цэнтральную гарадскую паліклініку, праз якую прапусціла кансультацыю ў Віцебску

Паліклініка: планавы медагляд можна прайсці цягам месяца

Пасля абмеркавання сітуацыю вырашыў праверыць kraj.by. Журналісты зайшлі на сайт электроннага запісу і паведамілі, што знайшлі свабодныя талоны практычна да ўсіх дзіцячых спецыялістаў ужо ў ліпені, а таксама на наступныя месяцы. Пасля гэтага яны звярнуліся па каментар у дзіцячую паліклініку.

Ва ўстанове аховы здароўя заявілі, што планавы медагляд можна прайсці цягам месяца, а ў цяперашні час талоны да ўсіх урачоў-спецыялістаў ёсць у наяўнасці. Акрамя таго, у паліклініцы нагадалі, што дзеці са станамі, якія патрабуюць тэрміновай медыцынскай дапамогі, прымаюцца без чаргі і без папярэдняга запісу.

Такім чынам, kraj.by фактычна абвергае высновы аўтаркі публікацыі. Аднак сама дыскусія паказала, што ў бацькоў застаюцца розныя ўражанні ад працы сістэмы запісу. Пакуль адны без праблем афармляюць талоны праз інтэрнэт, іншыя працягваюць скардзіцца, што ў патрэбны момант свабодных месцаў няма, а трапіць да асобных спецыялістаў аказваецца значна складаней.

Чытайце таксама: «Толькі грэйдар праязджаў». Камунальнікі падманулі жыхароў Маладзечна з рамонтам вуліцы