«Снег проста звалiлi на абочыны»: Жыхары Пiнска скардзяцца на ўборку вулiц

У TikTok з’явіліся відэа, на якім жыхар Пінска паказаў сітуацыю з уборкай снегу ў горадзе. Паводле яго слоў, снегаўборачная тэхніка не вывозяць снег нават з галоўных вуліц, а проста скідвае яго на абочыны каля тратуараў і агароджаў. У выніку снежныя гурбы замінаюць руху аўтамабіляў і значна ўскладняюць перасоўванне пешаходаў.

@belarus_2105 #рб #пинск #проблема ♬ оригинальный звук — Belarus

Чытайце таксама: У розных гарадах Беларусі з’явіўся «бясплатны каток»: але ёсць нюанс

Аўтар відэа звяртае ўвагу і на пытанні бяспекі. Ён адзначае, што вясной, калі снег пачне раставаць, уся гэтая маса апынецца на тратуарах і праезнай частцы, а пры наступных маразах можа ператварыцца ў галалёд. Нават для аўтамабілістаў у такіх умовах пагаршаецца агляднасць.

@belarus_2105 #снег #пинск #рб #проблема #почему ♬ оригинальный звук — Belarus

У каментарах пад відэа жыхары пацвярджаюць, што падобная сітуацыя назіраецца не толькі ў адным месцы. Пінчане пішуць, што фактычна прыбранай выглядае толькі цэнтральная вуліца Леніна, у той час як у іншых раёнах тратуары застаюцца заваленымі снегам. «У Пінску ўсё без зменаў, чысцяць толькі вуліцу Леніна», — адзначае адзін з карыстальнікаў.

Асабліва востра праблема закранае пешаходаў і людзей з інваліднасцю. Па словах жыхароў, па заснежаных і слізкіх тратуарах складана не толькі хадзіць, але і суправаджаць тых, каму патрэбна дапамога. «Мне, напрыклад, цяжка ісці з чалавекам з інваліднасцю, а ўчора я сама атрымала траўму калена», — піша адна з жыхарак у каментарах.

Пінчане таксама нагадваюць, што на вываз снегу з гарадскіх вуліц штогод выдзяляюцца бюджэтныя сродкі, аднак на практыцы снег часта не вывозяць, а пакідаюць чакаць, пакуль ён растане сам. Гэта, на думку жыхароў, стварае дадатковыя рызыкі і робіць перамяшчэнне па горадзе ўзімку небяспечным.

Падобныя скаргі — не ўпершыню

З пачаткам цыклону «Улі», які прынес шмат снегу ў Беларусь, жыхары Пінска звярталі ўвагу на якасць працы камунальных службаў. На адной з вуліц, дзе працавала снегапрыборачная тэхніка, снег звалілі проста ў жылы двор. Праз гэта простым жыхарам давялося самастойна разграбаць наступствы прыборкі камунальнікаў і прыбіраць снег з праездаў, каб машыны змаглі выехаць са двароў.

На відэа, якім падзяліліся мясцовыя жыхары, відаць, што дарогу настолькі замяло, што па ёй было немагчыма праехаць грамадскаму транспарту з аднаго боку, а з іншага боку — выехаць аўтамабілям са двароў.

Чытайце таксама: Ці варта беларусам хвалявацца праз змены клімату? Адказвае эколаг