Сто Кацюш і 81 гадзіна патрыятызму: як на Магілёўшчыне 9 траўня ператвараюць у маштабнае шоу

На Магілёўшчыне сёлета вырашылі адзначаць Дзень Перамогі не проста шырока, а максімальна маштабна, працягла і сімвалічна. У Касцюковічах збіраюць сто жанчын з імем Кацярына дзеля аднаго выканання «Кацюшы», а ў Магілёве рыхтуюць 81-гадзінны патрыятычны марафон з канцэртамі, начнымі кінапаказамі і прапагандысцкім ухілам.

Чытайце таксама: У Магілёве да 9 траўня правядуць 81-гадзінны марафон з канцэртамі і начнымі паказамі фільмаў

Як звярнула ўвагу «Магілёў.медыя», у абласным цэнтры акцыя «81 гадзіна да Вялікай Перамогі» стартуе 6 траўня а 10-й раніцы і працягнецца да 9 траўня 19:00 каля абласной філармоніі. Такі фармат выглядае незвычайна нават па мерках традыцыйных травеньскіх святкаванняў: фактычна гаворка ідзе пра бесперапынны трохсутачны марафон, дзе маштаб сам па сабе становіцца галоўнай часткай задумы.

У сетцы кожны ваш клік пакідае след, які могуць выкарыстаць супраць вас. Не дазваляйце нікому ператвараць вашыя інтарэсы ў крымінальныя справы. Уключайце BGlobal VPN — заставайцеся нябачнымі для старонніх вачэй.

Спасылка на падключэнне BGlobal VPN — тут

У Касцюковічах жа вырашылі зрабіць стаўку на лакальны, але не менш паказальны фармат. 7 траўня а 18-й гадзіне каля раённага цэнтра культуры арганізатары хочуць сабраць роўна сто Кацярын, каб хорам выканаць «Кацюшу».

Што выклікае пытанні

Ідэя выглядае яскрава, хоць і выклікае шэраг практычных пытанняў. Напрыклад, ці сапраўды ў раёне знойдзецца патрэбная колькасць Кацярынаў. Тэарэтычна — так. Насельніцтва Касцюковіцкага раёна складае каля дзесяці тысяч чалавек, таму некалькі соцень носьбітак гэтага імя там цалкам могуць быць.

Але застаюцца і іншыя нюансы. Ці будуць правяраць пашпарты, каб у хор выпадкова не трапілі жанчыны з менш «профільнымі» імёнамі? І што атрымаецца музычна, калі калектыў будуць падбіраць паводле імя, а не вакальных здольнасцяў? Зрэшты, арганізатары адразу даюць зразумець: галоўнае тут не прафесійнае гучанне, а сімвалізм і душэўнасць.

На гэтым фоне Магілёў ідзе яшчэ далей. Удзень — канцэрты і патрыятычныя імпрэзы, уначы — паказы ваенных фільмаў пад адкрытым небам. Пры гэтым у праграме пераважаюць расійскія стужкі, у тым ліку новыя, а таксама прадукцыя з выразным прапагандысцкім акцэнтам, уключна з фільмам беларускага прапагандыста Рыгора Азаронка.

Пакуль незразумела, колькі людзей сапраўды захоча ўдзельнічаць у такім фармаце, асабліва ноччу і пад адкрытым небам, калі надвор’е можа быць далёка не святочным. Таму ўзнікае пытанне: гэта найперш разлік на цікавасць жыхароў ці ўсё ж стаўка на маштабнасць самога мерапрыемства.

І гісторыя са ста Кацюшамі ў Касцюковічах, і 81-гадзінная акцыя ў Магілёве добра паказваюць агульны падыход: чым больш маштабная і гучная афіша, тым лепш выглядае справаздача пра святкаванне.

Чытайце таксама: Открытие памятника сожженным деревням в Столинском районе не обошлось без админресурса, танцев, госфлагов и автопробега