Супрацоўнік Полацкага малочнага камбіната паказаў паведамленне пра звальненне. Раней абяцалi, што скарачэнняў не будзе

Яшчэ вясной прадстаўнікі ўладаў і дзяржаўныя СМІ запэўнівалі работнікаў Полацкага малочнага камбіната, што пасля перадачы прадпрыемства холдынгу «Савушкін прадукт» скарачэнняў не будзе. Аднак цяпер адзін з супрацоўнікаў апублікаваў паведамленне пра будучае звальненне па скарачэнні штата.

Чытайце таксама: Молочные реки приносят золотые берега: «Савушкин продукт» бьет рекорды по выручке и прибыли

У красавіку гендырэктар «Савушкінага прадукту» на сустрэчы з калектывам абяцаў, што работнікаў звальняць не будуць

Дакумент у TikTok паказаў начальнік гаража віцебскага транспартнага ўчастка Павел Асіран. Згодна з паведамленнем ад 2 чэрвеня 2026 года, яго пасада падлягае скарачэнню з 10 жніўня. У дакуменце прама гаворыцца, што мерапрыемствы па скарачэнні штата праводзяцца «у сувязі з продажам і перадачай у арэнду маёмасці ААТ «Полацкі малочны камбінат» у адрас ААТ «Савушкін прадукт»».

З’яўленне такога паведамлення выглядае нечаканым на фоне папярэдніх заяў. Яшчэ ў красавіку генеральны дырэктар «Савушкінага прадукту» Аляксандр Савчыц на сустрэчы з калектывам абяцаў, што работнікаў звальняць не будуць. Паводле яго слоў, нават калі пасля мадэрнізацыі частка працэсаў стане аўтаматызаванай, супрацоўнікаў перанавучаць і прапануюць ім новыя спецыяльнасці. Ён прама заяўляў, што «нікога з работнікаў малочнага камбіната не звольняць, калі яны самі пажадаюць працаваць далей».

Падобныя заявы гучалі і пазней. У чэрвені дзяржаўныя СМІ расказвалі пра працэдуру банкруцтва прадпрыемства як пра спосаб захаваць вытворчасць і рабочыя месцы. Падкрэслівалася, што інвестары зацікаўлены ў захаванні калектыву, а работнікам абяцаюць перавод да новых уласнікаў з захаваннем занятасці, сацыяльных гарантый і ўзроўню заробку.

Сёння адзін клік ці падабайка могуць каштаваць занадта дорага. Гісторыя вашага браўзэра не павінна быць падставай для пераследу. BGlobal VPN. цалкам шыфруе ваш трафік. Заставайцеся ў бяспецы.

Спасылка на падключэнне BGlobal VPN – тут

Цяпер жа з’яўляецца першы публічна вядомы дакумент пра скарачэнне супрацоўніка. Пакуль невядома, ці ідзе гаворка пра адзінкавыя выпадкі, ці скарачэнні закрануць і іншых работнікаў прадпрыемства.

Нагадаем, Полацкі малочны камбінат знаходзіцца ў працэдуры банкруцтва. Прадпрыемства назапасіла даўгі больш чым на 377 мільёнаў рублёў і павінна перайсці пад кіраванне холдынгу «Савушкін прадукт». У Полацку плануюць правесці маштабную мадэрнізацыю вытворчасці, укласці дзясяткі мільёнаў еўра інвестыцый і пабудаваць фактычна новы завод. Таксама ўлады і інвестары абяцаюць захаваць вядомыя брэнды «Сафійка» і «Мі-Шу», а агульная сума заяўленых інвестыцый у праекты ацэньваецца прыкладна ў 300 мільёнаў рублёў.

Чытайце таксама: «Это называется “отписка”»: что ответил «Савушкин продукт» на жалобу покупательницы и почему мнения в сети разделились