Сядзібу з вежай-абсерваторыяй пад Столінам прадалі за $18 тысяч

Старадаўняя сядзіба Алешаў у пасёлку Нова-Беражное Столінскага раёна ўсё ж знайшла новага ўладальніка. Комплекс, які ўжо спрабавалі прадаць сёлета, на гэты раз сышоў з аўкцыёну за 54 792 рублі — каля $18,1 тысячы. Пра вынікі таргоў паведамляе Domovita.by.

Чытайце таксама: У Песках адновяць гатычную браму сядзібы Пуслоўскіх. А што будзе з самой сядзібай?

Першая спроба продажу скончылася няўдала: пераможца таргоў у апошні момант адмовіўся ад набыцця. Пра гэта раней пісала «Наша Ніва».

На таргах зрабілі 33 стаўкі

Падчас паўторных таргоў за сядзібу спаборнічалі два ўдзельнікі. За дзве з паловай гадзіны яны зрабілі 33 стаўкі.

Лот выставілі з пачатковай цаной 12 892 рублі. У выніку яна павялічылася ў 4,3 раза — да 54 792 рублёў.

Новым уладальнікам стала прыватная будаўнічая арганізацыя з Пінска.

Пры гэтым падчас вясновых таргоў кошт сядзібы вырас значна вышэй — амаль да 128,2 тысячы рублёў. Аднак пераможца з Альшанаў, які атрымаў права набыць маёнтак, перад афармленнем здзелкі адмовіўся ад яго.

Цяпер продаж адбыўся. Разам з будынкамі ўладальнік атрымаў права 50-гадовай арэнды зямельнага ўчастка плошчай каля 37 сотак.

Тут была хатняя абсерваторыя

Сядзібу пабудавалі ў 1890 годзе. Галоўны будынак плошчай каля 426 квадратных метраў выкананы з чырвонай цэглы ў неагатычным стылі. У яго архітэктуры захаваліся лучковыя вокны, тэраса і стрыманыя дэкаратыўныя элементы.

Але найбольш незвычайная дэталь маёнтка знаходзіцца не ў самім доме. З боку парку да яго прымыкае гранёная двухпавярховая вежа.

Апошнім уладальнікам сядзібы быў Канстанцін Алеша. Ён вучыўся ў Германіі і цікавіўся астраноміяй, таму абсталяваў вежу пад хатнюю абсерваторыю. Адтуль гаспадар мог назіраць за начным небам праз тэлескоп.

З гэтым жа шляхецкім родам звязваюць савецкага пісьменніка Юрыя Алешу.

Вакол дома захаваўся стары парк

Сядзібу атачае пейзажны парк англійскага тыпу плошчай каля пяці гектараў. Яго заклаў нямецкі садоўнік Карл Байзерт.

У парку захаваліся старыя і рэдкія дрэвы, сярод іх — чорная сасна і лістоўніца Кемпфера. Цяпер тэрыторыя моцна заросла, але частка гістарычнай планіроўкі і расліннасці ўсё яшчэ захоўваецца.

У савецкі перыяд сядзібны дом ператварылі ў жыллё для работнікаў мясцовага спіртзавода. Паступова кватэры апусцелі, пасля чаго будынак закансервавалі. Без пастаяннага догляду ён пачаў разбурацца.

Нягледзячы на гісторыю і архітэктурныя асаблівасці, сядзіба Алешаў пакуль не мае статусу матэрыяльнай гісторыка-культурнай каштоўнасці. Цяпер маёнтак перайшоў у прыватныя рукі.

Чытайце таксама: У Клімавічах беларуская мова знікла з грамадскага транспарту