У Асіповічах на 17 участкаў — 12 урачоў. Жыхарам тлумачаць, чаму не хапае талонаў

Паліклініка Асіповіцкай цэнтральнай раённай бальніцы растлумачыла, чаму жыхары часта скардзяцца на адсутнасць талонаў да ўрачоў.

Чытайце таксама: У вёсках Крычаўскага раёна некалькі разоў на месяц будзе прыязджаць медык. Ці заменіць гэта стацыянарныя пункты?

Загадчыца паліклінікі Вольга Якімец назвала некалькі прычын. Тры чвэрці талонаў размяркоўваюць для папярэдняга запісу на тры месяцы наперад, яшчэ чвэрць прызначаная для паўторных прыёмаў. Да неўролага, отарыналарынголага, кардыёлага і эндакрынолага ўпершыню можна трапіць толькі па накіраванні ўрача агульнай практыкі.

Вузкія спецыялісты таксама ўдзельнічаюць у камісіях і праводзяць дыспансерызацыю. А ў рэгістратуры пераважна працуюць супрацоўнікі без медыцынскай адукацыі.

Адна з асноўных праблем — недахоп кадраў. На 17 тэрапеўтычных участкаў цяпер прыпадаюць 12 урачоў агульнай практыкі.

Яшчэ ў студзені 2024 года Асіповіцкая ЦРБ паведамляла, што ўсе 17 тэрапеўтычных участкаў цалкам укамплектаваныя ўрачамі. Тады ў бальніцы працавалі 131 урач, а да канца года іх колькасць склала 126.

Чытайце таксама: «Ура, ЛОР прибыл!» Кобринчане радуются пополнению ЦРБ, но боятся, что молодые врачи быстро уедут

Медыкі працуюць больш чым на адну стаўку

У чэрвені 2026 года BGmedia пісала, што ў раёнах Гомельскай вобласці медыкі працуюць з нагрузкай да 1,37 стаўкі. Паводле дадзеных, агучаных першай намесніцай міністра аховы здароўя Аленай Богдан, сярэдні каэфіцыент сумяшчэння па краіне складаў 1,25. Гэта азначае, што многія медыцынскія работнікі бяруць дадатковую нагрузку.

Праблема асабліва адчувальная ў невялікіх гарадах і сельскай мясцовасці. Жыхары скардзяцца на чэргі і цяжкасці з запісам да вузкіх спецыялістаў, а маладыя медыкі пасля абавязковай адпрацоўкі нярэдка звальняюцца або імкнуцца пераехаць у большыя гарады.

У Бярозе пацыентам даводзілася займаць чаргу да стаматолага-хірурга з самай раніцы. Журналісты раённай газеты праверылі запіс у ЦРБ на сайце talon.by: на пэўную дату талоны былі даступныя толькі да аднаго з пяці стаматолагаў-хірургаў, прычым найбліжэйшы прыём прапаноўвалі праз два тыдні.

У Оршы і іншых гарадах праблема праяўляецца і ў чэргах на аналізы. У лютым BGmedia пісала, што беларусы скардзяцца на чэргі ў паліклініках, у тым ліку ў сталіцы. Сярод прычын, якія называлі самі пацыенты, — недахоп медыцынскага персаналу і нізкія заробкі.

Чытайце таксама: «Трапіць да неўролага — як у фантастыцы»: Жыхарка Бярозы раскрытыкавала працу мясцовай паліклінікі

Маладыя медыкі хочуць у Мінск, а рэгіёны чакаюць спецыялістаў

Пасля размеркавання выпускнікоў Беларускага дзяржаўнага медыцынскага ўніверсітэта ў лютым 2026 года ў сацсетках з’явіліся відэа з рэакцыямі маладых медыкаў. Частка выпускнікоў хацела атрымаць месца ў сталічных бальніцах і паліклініках. У каментарах жыхары рэгіёнаў нагадвалі, што спецыялістаў не хапае і ў абласных цэнтрах, і ў невялікіх населеных пунктах.

«Вельмі чакаем у Баранавічах, нам вельмі не хапае тэрапеўтаў», — напісала адна з карыстальніц пад ролікам выпускнікоў. Іншыя заклікалі выпускнікоў прыехаць працаваць у Барысаў і Астравец.

Праблема не абмяжоўваецца першаснай медыцынскай дапамогай. У матэрыяле пра Гомельскі і Мазырскі анкалагічныя дыспансеры BGmedia прыводзіла дадзеныя, паводле якіх у Мазырскім анкалагічным дыспансеры ўкамплектаванасць урачамі па фізічных асобах складала толькі 55%. Недахоп кадраў кампенсавалі сумяшчэннем, дзякуючы якому ўкамплектаванасць ставак дасягала 93%.

Чытайце таксама: Белстат рассказал, сколько зарабатывают врачи на Брестчине. К цифрам есть большие вопросы