У цэнтры горада — каналізацыйная аварыя? Случчане скардзяцца на бездзеянне камунальных службаў

Жыхары вуліцы Славянскай паведамляюць пра праблему з каналізацыйнымі сеткамі, якая, паводле іх слоў, не вырашаецца ўжо каля двух месяцаў. Людзі сцвярджаюць, што неаднаразова звярталіся ў адказныя службы, аднак да гэтага часу сітуацыя толькі пагаршаецца.

Чытайце таксама: «Хочацца не плакаць, а выць». Жыхарка Слуцка скардзіцца на падтапленні праз забітыя каналы

Адна з мясцовых жыхарак распавяла, што заяўка на рамонт была пададзеная яшчэ некалькі месяцаў таму.

«Два месяцы таму падавалі заяўку на рамонт. Прыедуць, паглядзяць і з’язджаюць. Учора пасля дажджу трубы забіліся граззю, пяском ці яшчэ чымсьці. Пасля гэтага люка ўсе астатнія пустыя. Каналізацыя далей не ідзе, ужо пачаліся праблемы ў жылым доме», — паведаміла яна.

Паводле яе слоў, аварыйную службу выклікалі яшчэ каля 17-й гадзіны, але нават да наступнай раніцы спецыялісты так і не прыехалі.

Асаблівае абурэнне выклікала інфармацыя, атрыманая праз службу 115. Там нібыта паведамілі, што тэрмін выканання работ прызначаны толькі на 11 чэрвеня.

«Гэта мы тры дні будзем заплываць фекаліямі ўсёй вуліцай?» — задаецца пытаннем жанчына.

На месцы ўжо бачныя наступствы

Фотаздымкі, зробленыя мясцовымі жыхарамі, сведчаць, што праблемны ўчастак агароджаны часовай стужкай і бетоннымі блокамі. Побач бачны правал грунту каля праезнай часткі, што можа сведчыць пра пашкоджанне падземных камунікацый або працяглыя праблемы з каналізацыйнымі сеткамі.

Жыхары таксама падзяліліся відэа, на якім зафіксаваныя каналізацыйныя воды, што выцякаюць на вуліцу.

Ніхто не ведае, які сайт у вашай краіне заблакуюць заўтра раніцай. Не чакайце, пакуль ваш інтэрнэт канчаткова ператворыцца ў пустыню. Будзьце гатовыя да любых забарон разам з BGlobalVPN.

Заставайцеся на сувязі. Спасылка на падключэнне BGlobal VPN — тут

Падобныя скаргі ўзнікаюць не ўпершыню

Праблемы з каналізацыяй і ліўневай сістэмай пасля моцных ападкаў рэгулярна становяцца тэмай абмеркавання ў беларускіх гарадах. Жыхары розных рэгіёнаў неаднаразова скардзіліся на затапленне вуліц, двароў і прыватных падворкаў пасля дажджоў.

Асабліва востра такія праблемы адчуваюцца ў прыватным сектары, дзе зношаныя сеткі або засмечаныя каналы могуць прыводзіць да падтаплення дамоў, падвалаў і гаспадарчых пабудоў.

На дадзены момант жыхары Славянскай чакаюць рэакцыі адказных службаў і спадзяюцца, што праблему атрымаецца вырашыць да таго, як чарговы лівень яшчэ больш пагоршыць сітуацыю.

Чытайце таксама: «Канализация фонтаном»: власти Пинска все-таки отреагировали на проблему в частном секторе после нашего материала