У дэкрэце — але «дармаед»: беларусцы налічылі завышаную суму за камунальныя паслугі

Беларуска, якая знаходзіцца ў дэкрэтным адпачынку, заявіла ў TikTok, што яе ўключылі ў спіс так званых «не занятых у эканоміцы». У выніку яна пачала плаціць за камунальныя паслугі па значна вышэйшых тарыфах.

Чытайце таксама: Шматдзетная віцяблянка прыйшла разбірацца з высокімі коштамі камунальных паслуг і даведалася, што яна дармаедка

Па словах жанчыны, яна ўжо сем месяцаў знаходзіцца ў дэкрэце, афіцыйна падавала ўсе неабходныя дакументы, але гэта не дапамагло пазбегнуць праблемаў. Замест звычайных налічэнняў ёй прыйшлі рахункі, якія істотна адрозніваюцца ад тых, што атрымліваюць іншыя.

«Куды можа ісці маці ў 7 раніцы? Правільна — высвятляць, чаму яна дармаед. Я знаходжуся ў дэкрэтным адпачынку ўжо 7 месяцаў, але чамусьці адміністрацыя вырашыла інакш», — распавядае яна.

@soznanieolgi Девочки,расскажите, кто сталкивался с этой проблемой? #мамавдекрете#мысливслух#беларусь#рек ♬ оригинальный звук — SoznanieOlgi

Асабліва яе здзівіла розніца ў аплаце ацяплення: «У мяне, напрыклад, за ацяпленне прыйшло 100 рублёў, у іншых — па 16–20. Каб даведацца, ці завышаная ў вас сума за камунальныя, лепш за ўсё параўноўваць з папярэднімі квітанцыямі».

У чым сутнасць праблемы

Сітуацыя выглядае як збой у сістэме ўліку «занятасці ў эканоміцы». Калі чалавека памылкова ўключаюць у адпаведную базу, ён аўтаматычна пачынае плаціць за частку камунальных паслуг па поўных тарыфах — без субсідый.

Пры гэтым дэкрэтны адпачынак — законная падстава, каб не трапляць у спіс «дармаедаў». Але на практыцы дадзеныя паміж рознымі структурамі не заўсёды сінхранізуюцца. У выніку чалавек можа атрымліваць дапамогу на дзіця і адначасова лічыцца «не занятым у эканоміцы».

«Не адзінкавы выпадак»: што пішуць беларускі

У каментарах пад відэа хутка стала зразумела, што гэта не адзінкавая сітуацыя — людзі апісваюць вельмі падобныя гісторыі.

Адна з жанчын напісала, што яе дзіцяці 10 месяцаў, але ёй таксама прыйшла завышаная квітанцыя. Пры гэтым ніякага папярэджання яна не атрымлівала. Яна адзначае, што ў цэнтры занятасці ёй не здолелі нармальна растлумачыць сітуацыю і сказалі, што трэба штогод пацвярджаць, што ў яе ёсць дзіця і яна ў дэкрэце:

• «Майму сыну 10 месяцаў, прыйшла завышаная жыровка. Ніякага паведамлення нават не даслалі. Я ў дэкрэце як самазанятая, але дапамогу атрымліваю праз працу мужа. Схадзілі ў цэнтр занятасці — там проста сядзяць і нічога не ведаюць. Сказалі кожны год прыносіць пасведчанне аб нараджэнні дзіцяці і даказваць, што я ў дэкрэце».

Іншая гісторыя — пра ліст аб «дармаедстве», які прыйшоў, калі дзіцяці было паўтара года:

• «Маёй дачцэ прыйшоў ліст з цэнтра занятасці, калі ўнуку было 1,5 года. Не з падатковай, а чамусьці з цэнтра занятасці. Яна самазанятая, сыходзіла ў дэкрэт, усё адзначалі ў падатковай. А там сказалі, што ім не перадалі дадзеныя. І незразумела, пры чым тут увогуле цэнтр занятасці».
  

Яшчэ адна жанчына адзначыла, што ёй проста паставілі ўмову рэгулярна пацвярджаць статус:

• «Дачцэ таксама прыйшоў ліст. У выніку сказалі кожны год у студзені прыносіць або дасылаць на электронную пошту ў гарвыканкам пасведчанні аб нараджэнні дзяцей, пакуль яна ў дэкрэце».

Хтосьці апісаў сітуацыю, калі доўгі час лічыўся «не занятым у эканоміцы» праз банальную памылку ў базе:

• «У мяне такое было. Калі малодшаму было 2,9 года, прыйшоў ліст, што я не ўдзельнічаю ў эканоміцы. Хаця атрымлівала дзіцячыя. Аказалася, у іх быў толькі старэйшы сын, а пра малодшага дадзеныя проста не трапілі. Адправіла пасведчанне — і ўсё выправілі».

Як вынікае з аповедаў беларусак у сацсетках, падобныя сітуацыі здараюцца не ўпершыню. Маладыя маці час ад часу расказваюць, што іх уключаюць у спісы «не занятых у эканоміцы» нават тады, калі яны афіцыйна ў дэкрэце і атрымліваюць выплаты.

У выніку жанчынам даводзіцца самім разбірацца з дакументамі і даказваць відавочнае — што яны не «дармаеды», а проста знаходзяцца ў дэкрэтным адпачынку.

Чытайце таксама: «Я ў поўнай дупе»: самазанятай налічылі за «камуналку» па кошце для «дармаедаў»