У Магілёве на некаторых вуліцах месяцамі няма святла. Жыхары скардзяцца на праблемы з асвятленнем

Жыхары Магілёва звяртаюць увагу на праблемы з вулічным асвятленнем у розных частках горада. Пра гэта паведамляюць мясцовыя карыстальнікі сацсетак, а некаторыя сцвярджаюць, што асобныя ўчасткі вуліц і алеяў застаюцца без святла ўжо некалькі месяцаў.

Чытайце таксама: «Ігнараванне выходзіць ужо на новы ўзровень». На вуліцы Тутарынава ў Слуцку па-ранейшаму няма асвятлення

Адна з апошніх скаргаў тычыцца парку Падніколле. Мясцовы жыхар распавёў «МагілёўОнлайн», што з 3 жніўня там не працуе асвятленне на значным участку — ад рэзідэнцыі Дзеда Мароза да пляжу.

Паводле яго слоў, ён некалькі разоў звяртаўся ў «Горсвет» і дыспетчарскую службу 115, але праблему так і не вырашылі. Пры гэтым побач працуе пункт пракату электрасамакатаў, а людзі працягваюць карыстацца алеяй вечарамі.

Калі цямнее, гэты ўчастак фактычна застаецца без асвятлення. У парку ў гэты час па-ранейшаму знаходзяцца людзі: хтосьці гуляе, хтосьці катаецца на роварах, самакатах ці дзіцячых машынках.

Журналісты «МагілёўОнлайн» праверылі сітуацыю на месцы. Каля 21:00 асноўнае асвятленне ў парку ўжо працавала, але на цэнтральных алеях ліхтары гарэлі праз адзін. На праблемным участку святла не было зусім — арыентавацца даводзілася па святле з іншых частак парку і аддаленых гарадскіх аб’ектаў.

Магіляўчане кажуць, што праблема не толькі ў Паднікольлі

У каментарах жыхары Магілёва распавядаюць пра падобныя сітуацыі і ў іншых раёнах, заўважыла BGmedia.

• «У Казіміраўцы на вуліцы Грунвальдскай збіраюць грошы на светлую будучыню, уключаючы асвятленне вуліцы пасля 22-й».

Яшчэ адзін магіляўчанін сцвярджае, што праблемы з асвятленнем можна заўважыць у розных частках горада:

• «Хачу сказаць, што ў Магілёве паўсюль праблемы з асвятленнем. Мала таго, што яго вельмі позна ўключаюць, а ў старых жылых раёнах мінімальная колькасць ліхтароў, дык яшчэ тое, што ёсць, працуе праз адзін».

На праблемы на вуліцы Мір-2 таксама звярнулі ўвагу:

• «На Мір-2 такая ж гісторыя. То ёсць, то няма. Вось пазаўчора ноччу цемра была, затое раніцай і ўвесь дзень учора гарэў ліхтар».

Падобная скарга прыйшла і з раёна Тэхнапрыбора:

• «На Тэхнапрыборы — ад «Белмаркета» (былога сотага магазіна) уздоўж самога «Тэхнапрыбора» (цяпер «Ольса») і да павароту на выезд з раёна — таксама цемра ўжо даволі даўно. Святло ўвогуле не ўключаюць — гэта такая эканомія?»

Яшчэ адзін карыстальнік распавёў пра праблему на так званым Нацыянальным спуску. Паводле яго слоў, на самой вуліцы і каля могілак святло ёсць, але ўчастак паміж імі застаецца цёмным.

• «Паставілі б хоць адзін ліхтар… Спуск круты, а яшчэ яго сапсавала вада, якая цячэ па ім падчас дажджоў. Пешшу можна навернуцца і твар разбіць. На ровары — тым больш. Людзі там пастаянна ходзяць — гэта самы кароткі шлях з Юбілейнага на Паднікольле і на пляцоўку Арджанікідзэ».

Знайшліся і тыя, хто паставіўся да сітуацыі з гумарам:

• «Ну навошта вы так, другую атамную станцыю пабудуюць — і будзе святло».
• «Нічога вы не разумееце! Гэта «Горсвет» па ўказанні зверху збірае грошы на пенсію для ўсіх пенсіянераў рэспублікі».

Пакуль гарадскія службы не паведамлялі пра тэрміны аднаўлення асвятлення на ўчастку каля Падніколля.

Чытайце таксама: «А где есть свет в час ночи, покажите?» Жители Мозыря поймали госТВ на лжи в сюжете про ночное освещение