У Слуцку адрамантуюць вуліцы і падрыхтуюць праект рэканструкцыі моста. У жыхароў узніклі пытанні да спісу дарог

У Слуцку ў гэтым годзе плануюць падрыхтаваць праектна-каштарысную дакументацыю для рэканструкцыі часткі вуліцы Максіма Багдановіча. Гаворка ідзе пра ўчастак ад вуліцы Камсамольскай да вуліцы Сафіі Слуцкай, дзе таксама знаходзіцца мост, які плануюць пераўладкаваць.

Чытайце таксама: Чарговая паказуха: у Слуцку здымалі свежы асфальт, каб раскласці яго па новых метках

Гэты адрэзак дарогі мае важнае значэнне для гарадской транспартнай сеткі: ён злучае некалькі вуліц і штодня выкарыстоўваецца аўтамабілістамі.

Як паведамілі ў КУП «Служба заказчыка жыллёва-камунальных паслуг Слуцкага раёна», пакуль гаворка ідзе толькі пра падрыхтоўку дакументацыі. Менавіта пасля яе распрацоўкі стане зразумела, калі можа пачацца сама рэканструкцыя і ў якія тэрміны яе плануюць правесці.

У горадзе адрамантуюць некалькі дарожных участкаў

Акрамя падрыхтоўкі праекта па вуліцы Багдановіча, у Слуцку ў гэтым годзе плануюць правесці рамонт шэрагу дарог.

Па адным з праведзеных тэндараў ужо вызначылі падрадчыка для рамонту пяці гарадскіх участкаў. Дамову атрымала мясцовая кампанія «Дарбудсэрвіс».

Згодна з умовамі кантракта, усе работы павінны быць завершаныя да 10 жніўня 2026 года. Агульны кошт рамонту складзе 887 411,56 рубля.

Работы пачнуцца вясной, але асноўная іх частка запланавана на летні перыяд — у чэрвені, ліпені і жніўні.

Плануецца абнавіць пакрыццё на наступных участках:

• вуліца Чэхава — ад вуліцы Леніна да вуліцы Зялёнай;
• вуліца Іванаўскага — ад вуліцы 14 Партызан да вуліцы Чэхава;
• вуліца Гастэла — ад вуліцы Будаўнікоў да 1-га завулка Максіма Багдановіча;
• вуліца Парыжскай Камуны;
• праезд ад вуліцы 14 Партызан да вуліцы Вялікае Кольца.

Усяго на гэтых участках плануюць адрамантаваць 13 830 квадратных метраў дарожнага пакрыцця.

Чытайце таксама: У Слуцку чарговая праблема з дарогамі. Гэтым разам на новым асфальтавым пакрыцці

Жыхары звярнулі ўвагу на адсутнасць іншых праблемных дарог

Аднак пасля публікацыі інфармацыі пра рамонт у каментарах з’явіліся пытанні ад жыхароў. Некаторыя адзначылі, што ў спіс не трапілі ўчасткі, якія, на іх думку, даўно патрабуюць рамонту.

Асаблівую ўвагу звярнулі на дарогу каля аграгарадка Навадворцы. Паводле мясцовых жыхароў, там ужо некалькі гадоў існуюць абмежаванні на рух.

• «Дзіўна, што не перад Навадворцамі. Там знак «праход забаронены» 5 гадоў стаіць», — напісаў адзін з карыстальнікаў.

Іншыя каментатары адзначылі, што праблемныя дарогі ёсць і ў самім горадзе, але яны таксама не апынуліся ў пераліку.

• «Вечаркевіча/Камсамольская і Чырвонаармейская, трымайцеся», — іранічна напісаў адзін з жыхароў, намякаючы, што рамонт на гэтых вуліцах пакуль не плануецца.

Нягледзячы на тое, што камунальныя службы анансуюць рамонт некалькіх дарожных участкаў у Слуцку, частка жыхароў лічыць, што ў першую чаргу трэба было ўключыць у план іншыя, больш праблемныя дарогі.

Чытайце таксама: У Слуцку абмеркавалі забудову мікрараёна «Жукаў Луг». Не ўсе жыхары згодныя з планамі