У Вежах Слуцкага раёна дарога стала непраезнай і непраходнай праз непрыбраны раней снег

У аграгарадку Вежы Слуцкага раёна мясцовыя жыхары звярнулі ўвагу на стан праезнай часткі. На відэа, якім яны падзяліліся ў сацсетках, бачна, у што ператварылася дарога з надыходам пацяплення.

Чытайце таксама: «Дзе лепш за ўсіх прыбралі снег?»: Галасаванне ЖКГ Міншчыны ў Telegram выклікала абурэнне беларусаў

Паводле слоў людзей, снег падчас моцных ападкаў своечасова не прыбіраўся. У выніку ў некаторых месцах засталіся снежныя гурбы, праз якія цяжка праехаць на легкавым аўтамабілі. У іншых частках вуліцы снег пачаў актыўна таяць і ператварыўся ў глыбокія лужыны і снежную кашу. Пешаходам даводзіцца абыходзіць ваду па краі дарогі або ісці проста па праезнай частцы.

Мясцовыя жыхары падкрэсліваюць, што праблема, на іх думку, не толькі ў натуральных прыродных зменах і пацяпленні, а ў тым, што падчас снегападаў дарогі дрэнна чысцілі камунальныя службы. У выніку наступствы ападкаў адчуваюцца і цяпер — выехаць у горад становіцца складана.

Чаму беларусы масава скардзіліся на камунальныя службы гэтай зімой?

Падобныя скаргі гэтай зімой гучалі па ўсёй краіне. Падчас снегападаў і цыклонаў «Леоні» і «Улі» праблемы закранулі як невялікія населеныя пункты, так і буйныя гарады.

У Бабруйску жыхары абураліся «кашаю» на вуліцах — снег своечасова не вывезлі, і ён ператварыўся ў слізкую масу, што ўскладняла як рух транспарту, так і перасоўванне пешшу. У Гродне гараджане паведамлялі, што праз высокія гурбы ўздоўж тратуараў людзі вымушаныя выходзіць на праезную частку, бо прайсці па ходніках было немагчыма.

У Магілёве скардзіліся на неачышчаныя тратуары — лёд і снег стваралі небяспечныя ўмовы для пажылых людзей і дзяцей. А ў Рэчыцы маладая маці не змагла прайсці з дзіцячай каляскай па тратуары з трохмесячным немаўлём — шлях быў завалены снегам.

У Талачыне жыхары звярталі ўвагу на неачышчаны прыпынак грамадскага транспарту, дзе людзям даводзілася чакаць аўтобус у снезе. А ў Гомелі да прыборкі снегу прыцягвалі «дармаедаў».

Сітуацыя ў Вежах стала часткай больш шырокай праблемы з уборкай снегу камунальнікамі, якая гэтай зімой закранула розныя рэгіёны Беларусі.

Чытайце таксама: У Касцюковічах «дармаедаў» прымусілі працаваць бясплатна пад дамамі сілавікоў