У вёсцы Пескі Мастоўскага раёна збіраюцца «ацыбуліць» царкву

У вёсцы Пескі Мастоўскага раёна Гродзенскай вобласці рыхтуюцца «ацыбуліць» нітрыдам тытану Свята-Мікалаеўскую царкву, паведамляе Telegram-канал «Спадчына».

«Цыбулізацыя» або антырэстаўрацыя Маскоўскага патрыярхата — перабудова праваслаўных храмаў Беларусі, пры якой іх архітэктурная і дэкаратыўная каштоўнасць губляецца, а будынкі «прыгожа пакрываюць» простымі матэрыяламі, звычайна металічнай цыбулепадобнай дахоўкай.

Свята-Мікалаеўская царква — помнік архітэктуры XIX стагоддзя, узведзены ў рэтраспектыўна-рускім стылі. Храм перажыў нават савецкі перыяд, калі многія святыні зачыняліся і ператвараліся ў склады ці хлявы.

Чытайце таксама:  Як змянілася колькасць школьнікаў у Брэсцкай вобласці за пяць год

Царква ў Песках не мае статусу гісторыка-культурнай каштоўнасці, што робіць яе неабароненай ад «рэстаўрацый», якія знішчаюць архітэктурную аўтэнтычнасць. Аднак ахоўны статус не заўсёды ратуе храмы ад «цыбулізацыі». Гэта добра бачна на прыкладзе царквы Святой Тройцы ў вёсцы Старыя Пескі Брэсцкай вобласці.

Пры гэтым наданне храму статусу гісторыка-культурнай каштоўнасці азначае яго ўключэнне пад дзеянне спецыяльнага заканадаўства, якое патрабуе захавання яго цэласнасці і архітэктурнай аўтэнтычнасці. Гэта стварае прававыя падставы для прыцягнення да адказнасці асобаў, што парушаюць патрабаванні па ахове і тым самым наносяць шкоду аб’екту.