У беларускіх школах ладзяць відэасустрэчы са зняволенымі. Цяпер — нават з жаночай калоніі

У беларускіх школах пашыраецца практыка відэасустрэч са зняволенымі. Калі раней для такіх мерапрыемстваў выкарыстоўвалі пераважна бабруйскія папраўчыя калоніі, то цяпер анлайн-гутаркі ладзяць і з вязнямі іншых установаў.

Чытайце таксама: Аршанскіх школьнікаў падключылі да стрыму са зняволенымі: ім паказалі жыццё ў калоніі

Сярод іх — жаночая калонія №24 «Зарэчча», дзе адбываюць пакаранне жанчыны, асуджаныя паўторна.

Падчас такіх сустрэч школьнікам расказваюць пра злачынствы і іх наступствы. У шэрагу выпадкаў размовы прысвечаныя незаконнаму абароту наркатычных рэчываў, а ў Жабінкаўскім раёне гаворка ішла пра злачынствы ў IT-сферы, звярнула ўвагу група праваабронцаў MAYDAY.team.

Відэасустрэчы з калоніямі ў Наваполацку і Ваўкавыску

У Полацкай сярэдняй школе №1 правялі так званы «стрым-семінар» з некалькімі вязнямі наваполацкай папраўчай калоніі №1.

6 кастрычніка відэасувязь са зняволенымі арганізавалі ў Шылавіцкай сярэдняй школе ў Ваўкавыскім раёне. Сустрэча праходзіла з прадстаўнікамі папраўчай калоніі №11. У абодвух выпадках размовы былі прысвечаныя злачынствам, звязаным з незаконным абаротам наркатычных рэчываў.

Школьнікам у Жабінкаўскім раёне паказалі жаночую калонію

Асаблівы выпадак — відэасустрэча, якую 29 верасня арганізавалі для навучэнцаў установаў адукацыі Жабінкаўскага раёна Брэсцкай вобласці. Школьнікі размаўлялі па відэасувязі са зняволенымі жаночай папраўчай калоніі №24 «Зарэчча».

На гэты раз гутарка тычылася не наркотыкаў, а злачынстваў у IT-сферы. Калонія №24 — установа, дзе адбываюць пакаранне жанчыны, асуджаныя паўторна.

Год таму школьнікам у Брэсцкім раёне зладзілі стрым з непаўналетнім вязнем

Анлайн-сустрэчы са зняволенымі выкарыстоўвалі і раней. Яшчэ год таму ў Брэсцкім раёне школьнікам арганізавалі стрым з турмы. Пра гэта паведамляў Telegram-канал «Крепость».

У відэасустрэчы ўдзельнічаў непаўналетні, які адбываў пакаранне ў папраўчай калоніі №2 у Бабруйску. Падлетка асудзілі паводле артыкула 328 Крымінальнага кодэкса — за дзеянні, звязаныя з наркатычнымі сродкамі і псіхатропнымі рэчывамі.

Падчас размовы ён расказаў пра сваю справу і жыццё ў калоніі, а таксама адказаў на пытанні школьнікаў. У сустрэчы ўдзельнічалі вучні чатырох навучальных установаў Брэсцкага раёна. Пасля яе яны абмяркоўвалі пачутае з прадстаўнікамі інспекцыі па справах непаўналетніх і сацыяльна-педагагічнага цэнтра.

Калоніі, суды і «прафілактыка злачынстваў»

Відэасустрэчы са зняволенымі — адзін з фарматаў, якія выкарыстоўваюць у працы са школьнікамі. У розных рэгіёнах Беларусі таксама ладзяць экскурсіі ў папраўчыя ўстановы і выязныя судовыя працэсы.

Падобныя мерапрыемствы падаюць як прафілактыку правапарушэнняў сярод падлеткаў. Аднак праваабаронцы разглядаюць такі падыход як форму запалохвання: замест таго каб абмежавацца тлумачэннем закону і адказнасці за злачынствы, школьнікам паказваюць калоніі, зняволеных або судовыя працэсы.

Асобная асаблівасць такіх сустрэч — яны адбываюцца непасрэдна ў навучальных установах, дзе відэасувязь са зняволенымі становіцца часткай «прафілактычнай працы» з вучнямі.

Чытайце таксама: Беларуские вузы начали закупать нары. Что происходит?