Якія замежныя тавары забаранілі ў Беларусі за апошні месяц

За апошні месяц Дзяржстандарт Беларусі выявіў шмат тавараў, што не адпавядаюць патрабаванням тэхнічных рэгламентаў. Мы паглядзелі на сайце ведамства, якія катэгорыі прадукцыі часцей за ўсё траплялі пад забарону і з якіх краін яны паступалі.

Большасць забароненых тавараў аказаліся харчовымі: дэсерты, прысмакі, безалкагольныя салодкія і слабаалкагольныя напоі, спецыі, гарбаты і соўсы.

Асноўныя прычыны забароны дэсертаў і прысмакаў — парушэнні пры выкарыстанні харчовых дадаткаў, араматызатараў і дапаможных сродкаў, а таксама праблемы з маркіроўкай і бяспекай прадуктаў. Амаль усе тавары, што трапілі пад забарону ў мінулы месяц, паходзяць з Расіі. Адзінае выключэнне — цукровая цукерка «Весёлый сюрприз» з Кітая (вырабнік JINJIANG XIEXIANG TRADE CORP., LTD).

Чытайце такама: Опасные покупки к 1 сентября: в Брестской области выявили некачественные школьные товары

Што да алкагольных і безалкагольных напояў, падставай для іх забароны стала наяўнасць серністай або сарбінавай кіслаты ў спалучэнні з бензойнай. Такая камбінацыя можа выклікаць алергічныя рэакцыі.

Дзяржстандарт выявіў небяспечныя для здароўя бактэрыі кішэчнай палачкі ў шэрагу расейскіх прадуктаў. Парушэнні зафіксавалі ў гарбатах ад ООО «Добрыня Дар» (Крым, Севастопаль), чорным молатым перцы ад ООО «Колычёвское производственное предприятие» (Расея, Дамадзедава), спецыях для плову ад ООО ПК «АРИКОН-ПРО» (Расея, Масква), а таксама ў сумесях «Хмелі-сунелі» ад АО «ПРОКСИМА» (Расея, Навасібірск) і ООО «ИВА» (Расея, Пскоў).

Адзіным беларускім таварам у гэтай катэгорыі апынуўся соевы соўс «Классический» ад ООО «Гимея» (г. Мінск). Прадукцыя не адпавядае патрабаванням бяспекі: у соўсе выяўлена перавышэнне дапушчальнага ўзроўню сарбінавай і бензойнай кіслот.

На другім месцы па колькасці забаронаў апынулася электратэхніка і радыёэлектроніка: свяцільнікі, лямпы, LED-панэлі, зарадныя прылады, разеткі і іншыя прыборы. Тавары забаранялі з-за парушэнняў па электрамагнітнай сумяшчальнасці, бяспецы нізкавольтнага абсталявання і наяўнасці небяспечных рэчываў. Практычна амаль усе тавары паходзяць з Кітая, за выключэннем аднаго беларускага: электрапомпа гандлёвай маркі «Olsa» (г. Магілёў).

Трэцяе месца па забароне за мінулы месяц займае дзіцячае і падлеткавае адзенне. Тавары забаранялі з-за парушэнняў патрабаванняў бяспекі для дзяцей і сродкаў індывідуальнай абароны. Большасць з іх паступіла з Расеі, Узбекістана, Турцыі і Кітая.

Читайте также: «А почему у вас в руках чужие телефоны?»: журналистка госСМИ спросила у родителей мнение о новом запрете в школе

Чацвёртае месца па колькасці забароненых тавараў займаюць дзіцячыя цацкі, забароненыя з-за парушэнняў бяспекі, перавышэння міграцыі фармальдэгіду і дапушчальнага ўзроўню шуму. Большасць цацак паступіла з Кітая, менш — з Расеі.

Найменш забароненых тавараў прыпала на парфумерыю, касметыку і мыйныя сродкі. У выпадку забароны парфумерна-касметычных сродкаў, забарона тычылася неадпаведнасці крытэрыям бяспекі гэтых сродкаў і выкарыстанню там забароненых сродкаў. Усе тавары гэтай катэгорыі паступілі з Расіі: “Formula Sexy Міст для цела з ферамонамі №3 і №4” ад ООО «Дельта Парфюм».

Мыйны сродак «Гель для мыцця каляровых тканін WEISSE GANS COLOR GEL» ад «Milwa Polska 1871» Sp.z o.o. Sp.k стаў адзіным забароненым таварам з Польшчы за мінулы месяц. Забарона абумоўлена тым, што сродак не прызначаны для аўтаматычных пральных машын з франтальнай загрузкай і можа ўводзіць спажыўца ў зман адносна бяспекі і прызначэння.

Такім чынам, згодна з дадзенымі Дзяржстандарта, лідарамі па забароне тавараў за мінулы месяц сталі Расея і Кітай: Расея — у катэгорыі харчовых прадуктаў, а Кітай — у катэгорыях электратэхнікі, радыёэлектронікі і цацак.

Читайте также: Пограничники незаконно ловят льготников, которые ездят из Беларуси в Польшу. История пострадавшего брестчанина