«Яма за ямай, адна суцэльная чача». Жыхары завулка ў Слуцку зноў просяць зрабіць дарогу

Жыхары завулка Сярогіна ў Слуцку зноў звярнулі ўвагу на стан дарогі, якая пасля чарговага дажджу ператварылася ў суцэльную паласу бруду і лужын. Паводле іх слоў, праблема існуе ўжо не першы год, аднак да асфальтавання справа так і не дайшла.

Чытайце таксама: Пасля аварыі на водаправодзе жлабінчане раскрытыкавалі ЖКГ

Як відаць на апублікаваных мясцовымі жыхарамі кадрах, праезная частка практычна па ўсёй даўжыні пакрытая глыбокімі выбоінамі, запоўненымі вадой. Пасля ападкаў дарога становіцца вязкай і калейнай: аўтамабілі вымушаныя павольна аб’язджаць ямы, а пешаходам даводзіцца шукаць вузкія сухія ўчасткі ўздоўж плотаў або ісці проста праз бруд. Месцамі лужыны займаюць амаль усю шырыню праезнай часткі.

«Яма за ямай. Людзі кожны дзень ідуць на аўтобус, і вось гэта вось чача па ўсёй вуліцы», — распавяла мясцовая жыхарка.

Паводле яе словаў, нават невялікага дажджу дастаткова, каб прайсці па завулку стала праблематычна.

Завулак не патрапіў у план рамонту

Для справядлівасці варта адзначыць, што ў апошнія гады ў Слуцку рамантуюць шэраг вуліц. У гарадскі план увайшлі дзясяткі дарог, дзе прадугледжаны рамонт або новае асфальтавае пакрыццё.

Аднак завулак Сярогіна ў гэты спіс зноў не трапіў. Чаму гэта адбылося, афіцыйна не тлумачылі. Пры гэтым, як сцвярджаюць жыхары, яны неаднаразова звярталіся з просьбамі заасфальтаваць вуліцу, бо пасля кожнага дажджу яна фактычна становіцца цяжкапраходнай як для пешаходаў, так і для аўтамабіляў.

Мясцовыя спадзяюцца, што праблемны завулак усё ж звернуць увагу пры наступным фарміраванні плана рамонту дарог.

Чытайце таксама: Жители Орши уже 6 лет не могут нормально выйти из подъезда после дождя. Оказалось, что таких мест в городе много