За Слуцкам па дарозе ў Навадворцы не працуе асвятленне

За Слуцкам на дарозе ў вёску Навадворцы ўжо больш за тыдзень не працуе вулічнае асвятленне. Мясцовыя жыхары скардзяцца, што ў цёмны час сутак дарога амаль непраглядная — не відаць ні пешаходаў, ні транспарту. Людзі кажуць, што ездзіць у такой цямры небяспечна, асабліва ў раёнах паваротаў і месцах, дзе ходзяць школьнікі.

Чытайце таксама: У Слуцку чарговая праблема з дарогамі. Гэтым разам на новым асфальтавым пакрыцці

Паводле саміх случчанаў, жыхары пакідалі адпаведную заяўку ў камунальныя службы, але пакуль ніякіх прыкметных зменаў няма. Відэа, зробленае паблізу новага мікрараёна, паказвае кантраст: каля самога мікрараёна ліхтары працуюць, а дарога, што вядзе ў Навадворцы, знаходзіцца ў поўнай цемры.

Праблема аказалася не адзінай ва ўсім раёне. Людзі паведамляюць, што на вуліцы Энергетыкаў у Слуцку сітуацыя такая ж — няма ні тратуару, ні асвятлення. Мясцовыя іранічна пішуць, што назва вуліцы гучыць асабліва смешна: «Вуліца Энергетыкаў без энергіі. Забаўна».

Жыхары просяць улады неадкладна аднавіць асвятленне, бо цяпер дарога небяспечная як для кіроўцаў, так і для пешаходаў. Людзі чакаюць рэакцыі камунальнікаў і спадзяюцца, што праблему вырашаць у найбліжэйшы час.

Чытайце таксама: У цэнтры Слуцка без тлумачэнняў пачалі спілоўваць дрэвы