Жыхарка Барысава не можа звольніцца з дзяржпрадпрыемства і сысці на іншую работу

Жыхарка Барысава Аляксандра распавяла пра сваю гісторыю ў TikTok. Паводле дзяўчыны, яна не можа звольніцца з неназванага дзяржпрадпрыемства нават са звычайным бестэрміновым кантрактам. Выкананне фармальных умоваў не дапамагае сысці: паводле словаў барысаўчанкі, у яе адрас нават паступаюць пагрозы з боку працадаўцы.

Чытайце таксама: Жывёлавод з Брэстчыны паказаў заробак і шакаваў людзей

Па словах самой дзяўчыны, яна планавала звольніцца з цяперашняга месца працы праз нізкі заробак. Але ўжо як тры тыдні ў яе нічога не атрымоўваецца: «Я тры тыдні не магу звольніцца з працы на дзяржпрадпрыемстве. Што рабіць, людзі? Я дзесяць парогаў адбіла ўжо», — дзеліцца Аляксандра ў сваім TikTok. «Праз тое, што мяне не звальняюць з дзяржпрадпрыемства, на якім не плоцяць, я не магу ўладкавацца на іншую аплочваемую работу», — распавядае яна.

Дзяўчына ўдакладніла ў каментарах пад відэа, што яна не звяртаецца ў пракуратуру па сваёй справе праз нежаданне абвастраць сітуацыю, бо раней яна была асуджаная (па якім артыкуле — Аляксандра не ўдакладняе).

Што адбылося пасля публікацыі відэа ў TikTok

У хуткім часе пасля публікацыі роліка, 04.02.2026, дзяўчына распавяла, што на яго негатыўна адрэагавалі на дзяржпрадпрыемстве. Калі яна паехала ў Мінск, каб спрабаваць уладкавацца на новае месца працы, яна атрымала званок ад працадаўцы: «Мне патэлефанавалі з пагрозамі, сказалі, што мяне нікуды не возьмуць на працу за тое, што я апублікавала відэа, і на мяне быццам бы аправілі скаргу», — распавядае дзяўчына ў «гісторыях» TikTok.

@sayx.cupidon SOS люди Беларуси #работа #беларусь #государство #закон ♬ оригинальный звук — SAYX

Яна падкрэслівае, што спрабавала ўсё вырашыць мірным шляхам, але гэта не ратавала яе ад далейшых пагрозаў: «І самае цікавае, што я абсалютна мірным шляхам спрабавала гэта зрабіць: я не звярталася ні ў Ахову працы, ні ўказвала на ўсе парушэнні, якія там існуюць, але пры гэтым я казёл адпушчэння. Я ўсяго толькі хацела сысці на працу, дзе будуць плаціць нармальна. Чаму я зараз сутыкаюся з такой сітуацыяй, дзе дарослыя і адэкватныя людзі пагражаюць проста за ні за што. Проста звольніце мяне, у чым праблема?», — задаецца пытаннем Аляксандра.

Што рабіць у сітуацыі, калі адмаўляюцца звальняць, нягледзячы на бестэрміновы кантракт

У каментарах пад відэа Аляксандры з’явілася шмат каментароў, дзе беларусы давалі ёй розныя парады па вырашэнню праблемы. Некаторыя карыстальнікі параілі «прагуляць» працу, каб яе дакладна адтуль звольнілі. Аднак, як сказала сама аўтарка відэа, працадаўцы пагражалі ёй тым, што з гісторыяй «прагулу» яна не зможа знайсці новае месца працы. Каментатары падзяліліся розным досведам звальнення па такой прычыне: у кагосьці пасля атрымалася ўладкавацца, пакуль хтосьці працу так і не знайшоў.

Іншыя людзі параілі дзяўчыне прапісацца ў родзічаў у іншым горадзе. Як сведчаць шматлікія каментары, гэта «самы правераны і бяспечны спосаб», які забяспечыць звальненне і не будзе пагражаць магчымым беспрацоўем.

Нагадаем, што згодна з арт. 40 Працоўнага кодэкса Рэспублікі Беларусь, работнік мае права звольніцца па ўласным жаданні з бестэрміновага кантракта, папярэдзіўшы працадаўцу пісьмова за тэрмін, прадугледжаны законам (звычайна 1 месяц). Пры гэтым працадаўца не мае права ўтрымліваць работніка на працы або адмаўляць у звальненні, калі ўсе патрабаванні апавяшчэння выкананы.

Чытайце таксама: На заводзе ў Касцюковічах работнікі працуюць у холадзе