Як Пуцін захапіў лукашэнкаў Палац незалежнасці і што гэта азначае

Галоўная падзея тыдня – саміт Еўразійскага эканамічнага саюза ў Мінску, куды завітаў і Уладзімір Пуцін. Палітычны аглядальнік Радыё Свабода Валерый Карбалевіч аналізуе папярэднія вынікі форума.

Сустрэчы кіраўнікоў дзяржаў—удзельніц КАЭС адбываюцца не радзей, чым раз на год, і праходзяць у той краіне, якая старшынюе ў блоку. Сёлета ў ЕАЭС старшынюе Беларусь, адпаведна, усе мерапрыемствы праводзяцца ў Мінску.

— Чатыры гады таму з’явілася новая традыцыя, паводле якой разам з самітам праводзіцца і так званы Еўразійскі эканамічны форум. На гэтае мерапрыемства збіраецца вялікая колькасць чыноўнікаў і разважае пра тое, як добра працуе эканамічны саюз. Усё гэта сумясцілася ў Мінску, — канстатуе Валерый Карбалевіч.

Чытайце далей: Что стоит за встречей Лукашенко с Келлогом и освобождением Тихановского?

Лукашэнка па праву гаспадара выступаў першым на абодвух мерапрыемствах.

— На такіх мерапрыемствах, як правіла, рэдка абмяркоўваюць сур’ёзныя праблемы, прынамсі, публічна. У публічных выступах усе кажуць, як усё добра, як усё цудоўна, якія велізарныя поспехі ў ЕАЭС. А таксама кажуць пра велізарныя перспектывы: трэба павысіць, паглыбіць, пашырыць і палепшыць. Ну і трошкі пра недахопы, — кажа аналітык.

Да прыкладу, Лукашэнка дазволіў сабе паразважаць пра недахопы ЕАЭС:

— Саюз паспяхова прайшоў этап станаўлення і дэманструе добрыя тэмпы развіцця. У мінулым годзе ВУП нашага аб’яднання вырас амаль на 4,5 працэнта, перасягнуўшы $2,5 трлн. Рост прамысловасці склаў 4,5 працэнта, інвестыцый у асноўны капітал — 7,5 працэнта. Пагадзіцеся, дастойны вынік. Дай бог на гэтым узроўні ўтрымаць.

Але чорт, як заўсёды, хаваецца ў дэталях. ВУП ЕАЭС складае ўсяго 4% ад сусветнага.

— Ці шмат гэта? Напрыклад, ВУП аднаго амерыканскага штата Каліфорнія – таксама прыкладна 4% сусветнага ВУП. Вось такія маштабы, — падкрэсліў палітычны аглядальнік.

Чытайце далей: Валерый Карбалевіч: Лукашэнка гандлюе тым «таварам», які мае

Лукашэнка таксама заклікаў цясней інтэгравацца, папракаў ананімных кіраўнікоў, якія глядзяць у неназваны бок, шукаюць іншых партнёраў па-за межамі ЕАЭС. Гучалі мантры 30—гадовай вытрымкі кшталту «нас нідзе не чакаюць, трэба аб’ядноўвацца на постсавецкай прасторы».

Звяртае ўвагу адсутнасць у Мінску прэм’ер-міністра Арменіі Нікала Пашыняна, які не прыехаў «з-за асабістага канфлікту з Лукашэнкам». Армянскі прэм’ер лічыць, што ў нядаўнім канфлікце Арменіі і Азербайджана Лукашэнка заняў бок Азербайджана.

— Можна сказаць, што Лукашэнка скарыстаўся гэтым самітам дзеля сустрэч з кіраўнікамі тых дзяржаў, якія прыехалі ў Мінск, ці з кіраўнікамі дэллегацый. Сустракаўся з кіраўнікамі постсавецкіх краін, але гэта руціна. Лукашэнка паспеў сустрэча з прэзідэнтам Кубы, прэм’ерам М’янмы і іншымі прадстаўнікамі дэлегацый. Але якая добрая ілюстрацыя: падчас сустрэчы з прэзідэнтам Кубы Лукашэнка казаў, што адносіны сяброўскія, а эканомікі амаль няма. Гандлёвы абарот трохі больш чым 10 мільёнаў долараў – гэта мізэр, гэта нішто, — канстатаваў Валерый Карбалевіч. – А чаму тады мізэрны гадлёвы абарот? Прычына простая: Куба вельмі бедная краіна, ёй няма чым плаціць за беларускі экспарт.

Таму ўсё большую папулярнасць набывае бізнэс па—лукашэнкаўску: беларускі Банк разіцця дае Кубе крэдыты, каб за гэтыя грошы Куба купляла беларускія тавары. А калі яна верне крэдыты і ці верне ўвогуле – пад вялікім пытаннем.

Чытайце далей: Фридман: Лукашенко совершенно точно показал: каждый политзаключенный в Беларуси имеет свою цену

Што яшчэ ўразіла падчас гэтых мерапрыемстваў, дык гэта адсутнасць двухбаковай сустрэчы Лукашэнкі і Пуціна.

— Але як Лукашэнка ні імкнуўся, выкарыстоўваючы статус гаспадара форума, іграць першую скрыпку, давесці гэтую лінію да канца не ўдалося. Напрыканцы Уладзімір Пуцін паказаў, хто ў хаце гаспадар. Наўпрост у Палацы незалежнасці ён правёў прэс—канферэнцыю нібыта па выніках саміта. Ён гаварыў пар свае справы: вонкавую палітыку Расіі, адносіны з Захадам, ЗША, Украінай. У чым парадокс? Лагічна было б, каб да прэсы выйшлі прэзідэнты ўсіх краін – сябраў ЕАЭС дзеля падвядзення вынікаў саміта. А калі ўжо эканомілі час, то паводле пратаколу і палітэсу падвесці высновы павінен быў гаспадар саміта, ён жа – цяперашні старшыня ў саюзе, то—бок Лукашэнка. Але не: Пуцін ў беларускім палацы незалежнасці павёў сябе як паўнаўладны гаспадар. Ён правёў прэс—канферэнцыю нават без прысутнасці апошняга. І гэты сюжэт вельмі паказальны, — рэзюмаваў Валерый Карбалевіч.