«Беспрацоўных тэрарызуюць!» Беларуска распавяла пра новыя пагрозы ўладаў

Беларуска Мілана падзялілася праблемай у сацсетцы Threads. Там яна расказала пра тое, што яе, як беспрацоўную, пачалі «тэрарызаваць» паведамленнямі, дзе патрабавалі прыйсці па пэўным адрасе. У выпадку нез’яўлення — пагроза штрафам ці арыштам. Пагрозы дайшлі нават да яе маці.

«У Беларусі тэрарызуюць беспрацоўных. Сітуацыя: тры гады не працую. Спачатку даслалі паперкі з патрабаваннем кудысьці паявіцца (на адрас прапіскі, хаця я там не жыву), са зноскай: маўляў, калі не прыйдзеце — будзе штраф ці арышт. Я нікуды не пайшла, бо паперкі мне асабіста ніхто не даваў, а па прапісцы не жыву, асабіста іх не бачыла. Пасля гэтага сталі прыходзіць па некалькі разоў на тыдзень па адрасу прапіскі, даўбіцца ў дзверы маці. Хіба гэта окэй?» — распавядае беларуска.

Беларуска таксама задалася пытаннем: «З якой халеры я павінная працаваць, а яны маюць права тэрарызаваць маю маці? Здаецца, працаваць — гэта права, а не абавязак».

Чытайце таксама: Міліцыя ўзялася за «дармаедаў» за мяжой. Падключылі нават ДАІ

Што ёй адказалі?

У каментарах з’явіліся спрэчкі. Адзін з карыстальнікаў адзначыў, што беларускія органы прыходзілі не да яе маці, а да яе самой: «Але яны ж не вашу маці шукалі, а прыйшлі па месцы вашай рэгістрацыі, дзе пражывае маці. Абнавіце дадзеныя рэгістрацыі або паведаміце фактычнае месца жыхарства. Добра гэта ці не — яны прыйшлі па вашай рэгістрацыі, да вас, а не да вашай маці».

На гэта дзяўчына адказала, што яе маці паведамляла, што дачка там не жыве, але яны ўсё роўна працягвалі прыходзіць: «Так, адзін раз прыйшлі і атрымалі адказ ад маці, што я тут не пражываю, дзе — яна не ведае. Чаму працягваюць хадзіць і траўмаваць пажылую жанчыну?».

Не зважаючы на спрэчкі, многія людзі падтрымалі аўтарку трэда. А нехта падзяліўся падобнай гісторыяй пра так званае «дармаедства»:

• «Тэрарызуюць. 25 гадоў стажу, вышэйшая катэгорыя. Тройчы лаўрэат конкурсу «Настаўнік года». Але COVID даў ускладненне, захварэла на астму. Задыхаюся, не магу праводзіць урокі (настаўніца англійскай мовы, дзе без размовы ніяк). Выклікалі на камісію, абыходзіліся са мной быццам з алкаголікам або апошнім бомжам. Апынулася ў бальніцы з ускладненнем астмы».

Ці законна пагражаць «дармаедам»?

Некаторыя людзі засумняваліся, што за няяўку на «прафілактычную размову» могуць пакараць арыштам або штрафам. Аднак Мілана прадставіла дакумент, які пацвярджае, што такія меры магчымыя.

Раней DW паведамлялі аб тым, што ў такіх дакументах пазначаюць, што грамадзянін «мае патрэбу ў «прафілактычнай размове» у сувязі з яго беспрацоўным статусам», і папярэджваюць, што няяўка на размову будзе расцэньвацца як непадпарадкаванне законнаму патрабаванню службовай асобы. Гэта адміністратыўнае парушэнне (арт. 24.3 КоАП), за якое можна атрымаць штраф ад 2 да 100 базавых велічынь (84 — 4200 рублёў), грамадскія працы, альбо арышт на суткі.

Аднак, паводле ч. 4 арт. 41 Канстытуцыі РБ, прымусовая праца забараняецца, за выключэннем выпадкаў, калі яна прызначаная па рашэнні суда або прадугледжаная законамі аб надзвычайным ці ваенным становішчы.

Хоць улады падаюць «прафілактычныя размовы» як законныя меры, яны фактычна супярэчаць Канстытуцыі. Узнікае юрыдычны парадокс: людзей караюць за адмову ад патрабаванняў прымусовага характару, якія Канстытуцыя наўпрост забараняе.

Чытайце таксама: Палітзняволены журналіст – намінант прэміі Сахарава. Што з ім цяпер?