«Да чыноўнікаў пах не даходзіць». Пад Кобрынам людзі пакутуюць ад смуроду

Аўтар відэа ў TikTok наведаў вёску Кісялёўцы пад Кобрынам і адзначыў, што там стаіць страшны смурод, «такі, што вам не перадаць!». Ён патлумачыў, што каля вёскі размясцілі завод для вытворчасці кампосту для шампіньёнаў «БТВ-Агро».

Цяпер навакольныя вёскі церпяць ад смуроду: «І хтосьці кажа, што шампіньёны не смярдзяць? Нават чуць не хачу, што тут нічога не смярдзіць!».

@oleg_nikityuk♬ оригинальный звук — OLEG_NIKITYUK

Раней чыноўнікі хваліліся новай вытворчасцю ў Кобрынскім раёне. Маўляў, для вытворчасці грыбнога кампосту патрэбна толькі салома, курыны гной і вапна — танная сыравіна, якую можна знайсці ў кожным калгасе. Таксама абяцалі, што тут з’явяцца новыя працоўныя месцы. А пра цану ўсяго гэтага — смурод, людзям нічога не сказалі.

Што сказалі мясцовыя

Да аўтара відэа ў каментары прыйшлі як вяскоўцы, так і жыхары Кобрына, якія пацьвердзілі, што жывуць у гэтым смуродзе і баяцца адкрыць вокны:

• «Я на Інтэрнацыянальнай жыву, вокны вечарам нельга адчыніць. Рэальным г…ном і як тады рэчы сушыць! Калі ў вёсцы не так смярдзіць, калі ўносяць угнаенні».
• «Смурод не толькі там. Смурод па ўсяму Кобрыну. Дом бацькоў маіх адразу каля шашы. Бываюць дні, што немагчыма выйсці на вуліцу ці вокны адчыніць. Проста задыхаемся».
• «Жыву ў Кісялёўцах. Магу сказаць адно – смярдзіць кожны вечар, а калі спёка – то ўсё».
• «Я дзіву даюся – як там людзі жывуць. Там праязджаеш міма – задыхнуцца можна».
• «Змагацца няма сэнсу. Ім дазволілі адкрыць гэтую вытворчасць, у іх усё добра, па словах чыноўнікаў і блогераў».

Знайшліся і тыя каментатары, якія прапанавалі напісаць калектыўныя звароты да чыноўнікаў, каб вырашыць праблему. А хтосьці пажартаваў з самой праблемы: «Пабудавалі смярдзючку каля горада — і ўсім жыхарам цяжка дыхаць. Відаць, да чыноўнікаў пах не даходзіць».

Раней, у 2024 годзе, рэгіянальныя газеты паведамлялі, што на прадпрыемстве правядуць аўдыт і пазбавяць месца ад непрыемнага паху. Аднак, зыходзячы са свежых відэа і каментароў мясцовых жыхароў, праблема дагэтуль застаецца нявырашанай.

Чытайце таксама: Лайфхак з Брэсцкага рынку: ён можа не спадабаецца прадпрымальнікам