У пітным фантане ў Маладзечне няма вады праз дрэнную сітуацыю з гепатытам А

У гарадскім парку Маладзечна перастаў працаваць пітны фантанчык каля амфітэатра. Як высветлілася, ваду адключылі па патрабаванні санстанцыі праз рызыку распаўсюду гепатыту А, што выклікала дыскусію сярод жыхароў у сацсетках.

Чытайце таксама: «Старыя назвы ў гэтай агучцы прыбіраем». У Маладзечне пераймяноўваюць адразу 62 аўтобусныя прыпынкі

Падача вады ў пітны фантанчык адключаная патрабаваннем санстанцыі

Жыхар Маладзечна шпацыраваў па гарадскім парку і звярнуў увагу на непрацуючы пітны фантанчык. Відэа пра гэта ён апублікаваў у TikTok. Мясцовыя СМІ заўважылі яго і «актуальнасць праблемы».

Камень, з якога калісьці цякла вада, знаходзіцца побач з амфітэатрам. Гэта адно з улюбёных месцаў адпачынку гараджанаў. Фантанчык тут усталяваны ў 2012 годзе да Дня горада.

Аўтара відэа, які хацеў піць, абурылі словы на таблічцы каля фантанчыка, якія абяцаюць здаволіць смагу чыстай і смачнай вадой «заўжды».

Kraj.by звярнуўся ў Маладзечнаводаканал. Там патлумачылі, што падача вады адключаная патрабаваннем санстанцыі.

У Маладзечанскім занальным цэнтры гігіены і эпідэміялогіі (МЗЦГЭ) паведамілі наступнае: «Пітны фантанчык не эксплуатуецца ў сувязі з негігіенічнасцю выкарыстання і, як вынік, высокай рызыкай пераносу інфекцыйных захворванняў, такіх як гепатыт А. Аднаўленне працы фантанчыка магчымае толькі пасля ўсталявання спрыяльнай абстаноўкі па захваральнасці на вірусны гепатыт А ў Маладзечанскім раёне».

Сегодня один клик или лайк могут стоить слишком дорого. История вашего браузера не должна быть поводом для преследований. BGlobal VPN. полностью шифрует ваш трафик. Оставайтесь в безопасности.

Ссылка на подключение BGlobal VPN – здесь 

Падобны каментар МЗЦГЭ даў і «Маладзечанскай газеце»: забарона эксплуатацыі крыніцы звязаная з негігіенічнасцю выкарыстання і, як вынік, высокай рызыкай пераносу інфекцыйных захворванняў, такіх як гепатыт А.

Паводле словаў галоўнага доктара цэнтра Алесі Бравай, дотык рукамі і вуснамі да крыніцы вады стварае ўмовы для перадачы ўзбуджальнікаў інфекцыйных хваробаў. Аднаўленне працы фантанчыка магчымае толькі пасля ўсталявання спрыяльнай абстаноўкі па захваральнасці на вірусны гепатыт А ў раёне.

Чытайце таксама: В Молодечно и Волковыске на 9 мая прошли вечерние дискотеки. В том числе — с диджеем

Жыхары Маладзечна: «Вады шкада, хай не хлусяць»

У каментарах у сацсетках жыхары Маладзечна выказваюць розныя версіі, чаму адключылі пітны фантан:

• «Вады шкада, хай не хлусяць».
• «Там лічыльніка [вады] няма».
• «То-бок у 2012 годзе было гігіенічна, а цяпер не. Цікава нават, а што змянілася?»
• «Дык няхай прыбяруць».
• «Прапаную ў сувязі з такой фармулёўкай прыбраць усе калонкі ў Маладзечне і Маладзечанскім раёне».

Якая сітуацыя з гепатытам А ў Маладзечне

Журналісты BGmedia праглядзелі сайт Маладзечанскага занальнага цэнтра гігіены і эпідэміялогіі. Напрыклад, 16 сакавіка 2026 года там паведамілі, што за мінулы перыяд 2026 года ў Маладзечанскім раёне зарэгістравана 4 выпадкі віруснага гепатыту А: тры ў дарослых і адзін у дзіцяці школьнага ўзросту. Статыстыкі за 2025 і 2024 гады на сайце няма, таму дынаміку адсачыць складана.

Напрыканцы верасня 2024 года «Белсат» распавядаў, што колькасць выпадкаў гепатыту А ў Беларусі за першае паўгоддзе 2024 года вырасла ў 14,6 раза. Большасць заражаецца «кантактна-бытавым» шляхам — дома і на працы.

Адзначым, што вірусны гепатыт A (ён жа Хвароба Боткіна) — вострае інфекцыйнае захворванне печані, ад якога няма спецыфічнага лячэння. Яго выклікае вірус гепатыту A, які перадаецца праз заражаную ежу і ваду. Гепатыт A не мае хранічнай стадыі развіцця і не выклікае пастаянных пашкоджанняў печані, імунная сістэма пасля заражэння забяспечвае далейшы імунітэт.

Чытайце таксама: В Беларуси планируют полностью победить вирусный гепатит С к 2028 году