«Паспець да закрыцця» і канфлікт з супрацоўнікамі: блогерка пра наведванне сядзібы ў Красным Беразе

Беларуская блогерка Ірына падзялілася сваёй гісторыяй. Дзяўчына збіралася наведаць палацава-паркавы комплекс Козел-Паклеўскіх у аграгарадку Красны Бераг Жлобінскага раёна і засталася незадаволенай.

Блогерку засмуціла тое, што комплекс працуе з восьмай раніцы па пятую гадзіну ўвечара ў буднія і выходныя дні: «Цікава, хто ездзіць туды ў нядзелю а восьмай раніцы?».

Вось, як сваю сітуацыю апісала аўтарка відэа: «Так атрымалася, што дабраліся мы туды бліжэй да закрыцця (але не пасля закрыцця!), и на маю просьбу пусціць у палац на хвілінку, хаця б зрабіць некалькі кадраў, сустрэла агрэсіўны супраціў працаўнікоў».

@ira.drummer♬ Drake style・Life Is Good style(1547997) — Burning Man

Ірына таксама адзначыла тое, што з такой жа сітуацыяй сутыкнуліся і іншыя турысты. Па словах блогеркі, яна пабачыла водгукі, дзе людзі звярнулі ўвагу на тое, што супрацоўнікі сядзібы часта сыходзяць раней за час сканчэння працы.

На меркаванне дзяўчыны, краіна ніколі не выйдзе на заслужаны ўзровень турыстычных месцаў, калі такое стаўленне да госцяў будзе нормай.

Чытайце таксама: «Да чыноўнікаў пах не даходзіць». Пад Кобрынам людзі пакутуюць ад смуроду

Што на гэта адказалі людзі

Некаторыя каментатары падтрымалі дзяўчыну і падзяліліся падобнымі гісторыямі.

• «Згодная з вамі: навошта патрэбны турыстычны аб’ект у працоўны час? Людзі ў будні з 8 да 17 працуюць, а не па музеях ходзяць. А потым, калі іх пачнуць скарачаць за нерэнтабельнасць, будуць крычаць, што пазбаўляюць працы, бедненькіх».
• «Разумею! Нядаўна самі былі ў гэтым цудоўным месцы. Супрацоўнікі, шчыра кажучы, вельмі нас засмуцілі. Мы прыехалі за паўгадзіны да закрыцця, і калі зайшлі, нам ужо не былі радыя. Яшчэ хвілін дзесяць чакалі, пакуль прададуць білеты. Апынулася, касір ужо сышоў, і мы чакалі не зразумела каго. Увесь астатні час, пакуль былі ў сядзібе, супрацоўнікі хадзілі за намі і абвяшчалі, колькі нам яшчэ можна па іх валоданнях пахадзіць. А ў 16:59 ужо адкрыта праяўлялі агрэсію, хаця мы якраз падыходзілі да выхаду. Атмасфера вельмі непрыемная і нездаровая, хоць сама сядзіба шыкоўная і ўнутры, і звонку».

Таксама знайшліся і іншыя меркаванні на тэму графіка працы музеяў:

• «Цікава, а што не так з тым, каб прыехаць у нядзелю а восьмай раніцы? Вам не прыходзіла ў галаву думка, што ўсе людзі розныя, у кожнага свае справы і клопаты, і яны едуць туды тады, калі ім зручна? Я якраз з тых, хто быў там у нядзелю а восьмай. Больш за тое, я быў не першы — людзі ўжо былі. А калі выходзіў з музея і ішоў да варот, тых, хто прыязджаў, стала яшчэ ўдвая больш. Таму я абсалютна не разумею гэтага заўвагі. Гэта ж не крама крокавай даступнасці: як запланавалі, так і едуць».
• «Калі моцна хацець і марыць, можна загаддзя азнаёміцца з графікам працы і адпаведна спланаваць маршрут».

 

Як працуюць іншыя сядзібы ў Беларусі

Для параўнання з палацава-паркавым комплексам у аграгарадку Красны Бераг мы паглядзелі графік працы іншых вядомых сядзібаў на іх афіцыйных сайтах.

Сядзіба Нямцэвічаў у Скоках (Брэсцкая вобласць) адкрыта для наведвальнікаў з аўторка па нядзелю з 10:00 да 19:00. Графік даволі зручны і можа падысці многім.

Палац Агінскіх у Залессе (Гродзенская вобласць) працуе з аўторка па нядзелю з 9:00 да 18:00. У суботу графік крыху скарочаны: установа закрываецца на перапынак з 13:00 да 13:30.

Сядзібна-паркавы комплекс Багушэвічаў у Кушлянах (Гродзенская вобласць) адкрыты для наведвальнікаў штодня з 10:00 да 19:00, акрамя панядзелка. Графік зручны і для тых, хто хоча зазірнуць у музей пасля працы — напрыклад, калі яна заканчваецца а 18-й.

Сядзіба Бохвіцаў у Флер’янава (Брэсцкая вобласць) працуе штодня. Але запіс у сядзібу на экскурсію мусіць быць папярэдні. Што цікава, у адрозненне ад папярэдніх месцаў, уваход туды бескаштоўны.

Сядзіба Бохвіцаў у Флер’янава (Брэсцкая вобласць). Крыніца фота: strada.by

Музей-сядзіба І.Е. Рэпіна «Здраўнёва» (Віцебская вобласць) адкрыты для наведвальнікаў з серады па нядзелю з 10:00 да 18:00. Адметна, што каса працуе да 17:30 — гэта адзіная сядзіба з разгледжаных, дзе ўказаны дакладны час працы касы.

Як бачна, большасць абраных сядзібаў працуюць даўжэй за комплекс Козел-Паклеўскіх: амаль усе — да шостай вечара, максімум — да сёмай. Пры гэтым толькі адзін музей — І.Е. Рэпіна «Здраўнёва» — пазначыў дакладны час працы касы. Адсутнасць такой інфармацыі можа прывесці да канфліктаў або непаразуменняў паміж наведвальнікамі і музейнымі супрацоўнікамі.

Чытайце таксама: У Брэсце былую помпавую вежу не прызналі каштоўнасцю і выставілі на продаж з умовай зносу