Жыхарка Купалы-7 пасля прыёму ў Савеце Рэспублікі зноў выявіла новыя праблемы капрамонта

Гісторыя жыхаркі дома №7 на вуліцы Янкі Купалы ў Мінску, якая ўжо шмат месяцаў адкрыта змагаецца за якасны капітальны рамонт, атрымала новы працяг. Пасля рэзанансных скаргаў, публікацый у TikTok і асабістага прыёму ў Савеце Рэспублікі жанчына спадзявалася, што сітуацыя нарэшце зрушыцца з месца. Аднак, паводле яе слоў, замест канчатковага вырашэння праблем у доме працягваюць выяўляцца ўсё новыя недахопы.

Чытайце таксама: Пасля гісторыі з прафлістам мінчанка зноў скардзіцца на капрамонт у ЖК «Купалы-7»

Раней мінчанка ўжо неаднаразова звяртала ўвагу на шэраг праблем: плот з прафлісту, які закрыў агляд на парк Горкага, адсутнасць доступу жыхароў да праектнай дакументацыі, пытанні да безбар’ернага асяроддзя, а таксама прыкметы недапрацаванага капрамонту (пабітыя шклаблокі, лесвіцы ля ўвахода ў пад’езд, а таксама фарба, што злазіць са сценаў).

Яна сцвярджала, што частка прадугледжаных работ магла быць не завершаная належным чынам, а пасля абнаўлення дома пачалі праяўляцца новыя будаўнічыя недахопы.

Дамагчыся асабістага прыёму ў Савеце Рэспублікі, як распавядала жанчына, было няпроста: тэлефанаванні заставаліся без адказаў, а самі звароты ў розныя інстанцыі перасылаліся паміж ведамствамі, а адказы часта насілі фармальны характар. У выніку сітуацыя змянілася толькі пасля шырокага грамадскага розгаласу.

Пасля сустрэчы з Наталляй Качанавай у Савеце Рэспублікі ёй паабяцалі, што дом павінны давесці «да лепшага выгляду», а кантроль за ходам работ будзе працягнуты. Больш за тое, жанчына заявіла, што ёй прызначылі памочніка, з якім пачалася праца па выпраўленні праблем.

@nadia.podrez Итоги приема в Совете Республики у Натальи Ивановны Кочановой. #самый_известный_балкон_минска #профлист #кочанова #надежда #котики ♬ оригинальный звук — Мудожественный Хузей

Але ўжо падчас чарговага агляду дома выявіўся новы спрэчны момант — стан шклаблокаў.

Чытайце таксама: Мінчанку, што скардзіцца на вынікі капрамонту ў доме, прымуць у Савеце Рэспублікі

Што выявілася пасля прыёма ў Качанавай

На відэа жыхарка паказвае супрацоўніку камунальных службаў шклаблокі, якія, паводле іх знешняга выгляду, выглядаюць настолькі зношанымі, што патрабуюць не частковага рамонту, а поўнай замены. Яна настойвае, што асобныя «латкі» не выратуюць сітуацыю, калі канструкцыя ў цэлым выглядае праблемнай — шкло без таго выглядае патрэсканым.

@nadia.podrez Не дом, а пункт приёма стеклотары. Один бой! В бой. #самый_известный_балкон_минска #жкх #капремонт #кочанова #минск ♬ оригинальный звук — Мудожественный Хузей

У адказ супрацоўнік адзначае, што некаторыя элементы тэарэтычна можна замяніць часткова, аднак жанчына падкрэслівае: калі ўжо рабіць, то якасна, а не так, каб пасля зноў вяртацца да таго ж пытання.

Акрамя шклаблокаў, яна зноў звярнула ўвагу і на іншыя праблемы: сцены, якія месцамі выглядаюць патрэсканымі, сумнеўныя выпраўленні ўжо зробленых работ і агульнае адчуванне, што частку недахопаў спрабуюць не ліквідаваць, а проста замаскіраваць.

Чытайце таксама: «Фарба не вытрымлівае ніякай крытыкі»: мінчанка паказала, як выглядае дом на Купалы-7 пасля капрамонту

Як на гісторыю адрэагавалі ў TikTok

У сацсетках беларускія карыстальнікі абурыліся самой сітуацыі. У каментарах людзі не хавалі здзіўлення, што нават пасля звароту ў высокія кабінеты праблема з вынікамі капрамонта не знікае. Знайшліся і тыя, хто заўважыў, што выпраўленні рамонтных працаў часам выглядаюць яшчэ горш за першапачатковы стан пад’езда. Некаторыя мяркуюць, што зацягванне і частковыя пераробкі могуць быць звязаныя не толькі з тэхнічнымі цяжкасцямі, але і з бюракратычнымі або фінансавымі нюансамі.

• «Дзіўна! Нават пасля звароту ў высокія інстанцыі работы выконваюцца няякасна, каб потым усё зноў перарабляць».
• «Нейкі трэш. Пасля выпраўлення становіцца яшчэ горш, чым было».
• «Відавочна, што сцяну трэба замяніць. Але як жа складана дамагчыся нармальна выкананай работы. Знаходзяцца мільёны адгаворак. Спачуваю вам».
• «Дык яны ўжо столькі актаў напісалі і спісалі! А гэта ж пад кожны акт ідуць фінансы! Усё ўпіраецца ў грошы — яны разумеюць, што можна спісаць і яшчэ раз спісаць. Паверце, я гэта прайшла шмат гадоў таму!».

Пакуль гісторыя з Купалы, 7 усё больш нагадвае тое, наколькі бывае складана неабыякавым жыльцам дамагчыся не проста рамонту «на паперы», а якаснага выніку. І, падобна, для гэтай мінчанкі барацьба з камунальными службами яшчэ далёкая ад завяршэння.

У сетцы кожны ваш клік пакідае след, які могуць выкарыстаць супраць вас. Не дазваляйце нікому ператвараць вашыя інтарэсы ў крымінальныя справы. Уключайце BGlobal VPN — заставайцеся нябачнымі для старонніх вачэй.

Спасылка на падключэнне BGlobal VPN — тут

Чытайце таксама: «Закрылі від на парк»: Мінчанка абурылася прафлістам каля элітнага дома ў цэнтры сталіцы