У Магілёўскім райвыканкаме прыдумалі «традыцыйную» страву — што вядома пра асянікі?

У Магілёўскім раёне абвясцілі пра з’яўленне «новай-старой» мясцовай стравы — асянікі (таксама «асяны» ці «асенікі»).

Чытайце таксама: Чыноўніца з Лёзна запрасіла пытанні ў TikTok, але не адкрыла каментары на сваёй старонцы

Паводле публікацыі дзяржаўнага выдання «СБ Беларусь сегодня», улады нібыта прэтэндуюць на ўключэнне гэтай стравы ў Спіс нематэрыяльнай культурнай спадчыны UNESCO, звяртае ўвагу Магілёў.media.

Крыніцай інфармацыі ў матэрыяле «СБ» стала не экспертка ў сферы этнаграфіі ці кулінарнай спадчыны, а загадчыца сектара культуры Магілёўскага райвыканкама Наталля Гоманава, якая і называе страву «брэндам раёна».

Што такое асянікі паводле чыноўнікаў?

Як сцвярджае прадстаўніца райвыканкама, асянікі нагадваюць дранікі, але ў іх, акрамя бульбы, дадаюць:

• гарбуз,
• моркву,
• цыбулю,
• зеляніну — кроп, пятрушку.

Страва нібыта гатавалася ў вёсках раёна «даўно і паўсюдна». Аднак факты не супадаюць з заявай чыноўнікаў

У беларускіх кнігах нацыянальнай кухні асянікі не згадваюцца наогул. Больш за тое, мясцовыя жыхары, з якімі адмыслова пагутарылі падчас падрыхтоўкі матэрыялу, прызналіся, што ўпершыню чуюць пра такую «традыцыйную страву».

Мясцовая газета «Прыдняпроўская ніва» таксама піша з амаль поўнай упэўненасцю, што асянікі вось-вось трапяць у міжнародны спіс. Але адкуль такая ўпэўненасць, выданне не тлумачыць. Найбольш верагодна, што ініцыятыва цалкам сыходзіць з райвыканкама.

Падобныя «кулінарныя праекты» выглядаюць як тыповая спроба чыноўнікаў стварыць штучны культурны брэнд дзеля справаздачнасці і ўмоўных поспехаў рэгіёна.

Такія хітрыкі вядомыя ва ўсім свеце, але беларускія бюракраты ў гэтым нярэдка ідуць яшчэ далей — ствараючы “традыцыі”, пра якія не ведаюць нават самі мясцовыя жыхары.

Чытайце таксама: У Гомелі ў аддзеле выпечкі сеткавай крамы пакупнікі пабачылі прусакоў