«А што, больш няма дзе маляваць?» На аграсядзібе ў Бярозаўскім раёне наведвальнікам дазваляюць размалёўваць козаў

Беларус у Threads падзяліўся кадрамі з мясцовага тэлебачання, якія яго абурылі. На іх відаць козаў з рознакаляровымі плямамі. Гаворка ідзе пра аграсядзібу «Дары матулі» ў Бярозаўскім раёне, дзе наведвальнікам прапануюць самастойна размалёўваць жывёл.

Чытайце таксама: «Там убивают!» Зоозащитники раскритиковали брестских таможенников, которые передали корм участку по отлову животных

Аўтар допісу сцвярджае, што на аграсядзібе каля ста козаў, а наведвальнікі могуць за асобную плату размалёўваць іх адмысловымі каляровымі алоўкамі. Пры гэтым пра такую забаву расказала і беларускае тэлебачанне, паказаўшы яе як незвычайны атракцыён для гасцей.

«Гэта жорсткае абыходжанне з жывёлаў!» — так аўтар пракаментаваў сітуацыю.

 

View on Threads

 

«Каму ўвогуле такая дзіч прыйшла ў галаву?»

Кадры выклікалі шмат негатыўных рэакцый у карыстальнікаў Threads. Частка беларусаў не зразумела, навошта ператвараць жывёл у аб’ект забавы для наведвальнікаў.

• «Каму ўвогуле такая дзіч прыйшла ў галаву…», — напісаў адзін з карыстальнікаў.

Іншы звярнуў увагу на тое, што жывёлы самі не могуць выбіраць, ці хочуць яны ўдзельнічаць у такой забаве:

• «Жывёлы не могуць сказаць НЕТ! А грошы, як заўсёды, руляць. Можа, вам зрабіць размалёўку наведвальнікам, а козы будуць назіраць за вашым шоу».

Яшчэ адзін чалавек напісаў:

• «А што, больш няма дзе маляваць, трэба на жывёлах? Зусім з глузду з’ехалі!»

Некаторыя людзі звязалі сітуацыю з тым, як дзеці могуць успрымаць падобныя забавы:

• «Тут пытанне не ў экалагічнасці, а ў тым, што заўтра будуць усе каты з балонаў размаляваныя. Дзеці не разумеюць, дзе можна пашаліць, а дзе небяспечна. Тут выразная мяжа павінна быць пазначаная».

Іншы каментатар таксама выказаў думку, што дзеці могуць зрабіць выснову, быццам размалёўваць жывёл можна любымі сродкамі:

• «Дурацкая забаўка для ідыётаў. А нічога, што дзетачкі потым зробяць высновы, што так размалёўваць можна ўсіх жывёл чым патрапіла. Ці вы ўсім будзеце тлумачыць, што маркеры бяспечныя?!».

Беларусаў абурыла і тое, што сюжэт пра такую «забаву» паказалі па тэлебачанні:

• «Яны яшчэ і па тэлевізары гэтую ***ню паказваюць».

Адна дзяўчына распавяла, што ўжо пакідала аграсядзібе негатыўны водгук:

• «Я ім пісала негатыўны водгук у мінулым годзе, і яны паспяхова яго выдалілі».

Чытайце таксама: На чырвонакніжную рысь зноў дазволілі паляваць. Колькі каштуе адстрэл і чаму беларусы абураюцца

Не ўсе ўбачылі тут жорсткае абыходжанне

Аднак частка карыстальнікаў не пагадзілася з такой ацэнкай.

«А дзе ўласна жорсткае абыходжанне?» — запытаўся адзін з іх.

Іншы чалавек адзначыў, што ў вёсцы жывёл традыцыйна маглі пазначаць фарбай:

• «Не бачу ў гэтым нічога дрэннага. Усё жыццё, колькі сябе памятаю, у вёсцы жывёл пазначалі фарбамі, каб не пераблытаць. А фарбаў тады спецыяльных не было, як цяпер. Таму нічога дрэннага ў гэтым няма, галоўнае, каб жывёлам падабалася і фарбы былі спецыяльныя».

Яшчэ адзін карыстальнік таксама не ўбачыў праблемы і параўнаў размалёўванне козаў з іншымі, на яго думку, больш сур’ёзнымі выпадкамі дрэннага ўтрымання жывёл:

• «Хапіла ж розуму такі пост напісаць… Адзін дождж і ні чаго як не было. Жорсткае абыходжанне — гэта калі б яны па жывот у гразі хадзілі, са зламанымі нагамі, касыя, крывыя, і калі б жывёлы пакутвалі».

Чытайце таксама: 160 сабак маглі застацца без прытулку. У Бабруйску за некалькі дзён сабралі 105 тысяч рублёў на выкуп зямлі

Што кажа «Зялёны тэлефон»

BGmedia звярнулася па каментар да экалагічнай ініцыятывы «Зялёны тэлефон», каб высветліць, на што варта звярнуць увагу ў такой сітуацыі.

Там адзначылі, што сама ідэя размалёўваць козаў дзеля забавы выклікае пытанні з пункту гледжання дабрабыту жывёл. Пры гэтым важна ведаць, якія менавіта сродкі выкарыстоўваюцца і як адбываецца сама працэдура.

Козаў сапраўды могуць маркіраваць у гаспадарчых мэтах. Але калі размалёўванне становіцца атракцыёнам для наведвальнікаў, неабходна ўлічваць бяспеку жывёл: ці бяспечныя сродкі для скуры і поўсці, ці могуць яны выклікаць раздражненне або алергічную рэакцыю, ці не трапляюць у вочы, рот і на слізістыя.

Асобнае пытанне — стрэс для саміх жывёл.

У сацсетках былі каментары людзей, якія сцвярджалі, што наведвалі аграсядзібу, а выкарыстоўваныя там фарбы натуральныя і бяспечныя. Некаторыя таксама пісалі, што козы ўспрымаюць размалёўванне як пагладжванне. Аднак, паводле «Зялёнага тэлефона», нават пры ўмове бяспекі фарбы варта задацца пытаннем, ці патрэбны наогул такі пастаянны фармат узаемадзеяння з жывёламі.

Калі аграсядзіба хоча прыцягваць наведвальнікаў, можна шукаць іншыя спосабы забаўляць гасцей без дзеянняў, якія патэнцыйна могуць дастаўляць жывёлам дыскамфорт.

Чытайце таксама: Витеблянка вновь подняла вопрос о состоянии зоопарка — проблеме уже десятки лет

Асобнае пытанне — дзеці

У «Зялёным тэлефоне» таксама звярнулі ўвагу на тое, як падобныя атракцыёны могуць уплываць на дзяцей.

На меркаванне эколагаў, калі дзіця бачыць, што размалёўваць жывёлу дзеля забавы — нармальная забава, яно можа паспрабаваць паўтарыць гэта дома з коткай, сабакам ці іншай жывёлай. Пры гэтым дома могуць быць выкарыстаныя зусім іншыя сродкі, бяспеку якіх для жывёл ніхто не правяраў.

Галоўнае пытанне паўстае ў тым, якую мадэль паводзінаў паказваюць дзецям.

У «Зялёным тэлефоне» таксама звярнулі ўвагу на тое, што да гісторыі былі прыцягнутыя тэлежурналісты. Замест пытанняў пра бяспеку жывёл, этычнасць такой забавы і яе ўплыў на дзяцей сюжэт, паводле ацэнкі ініцыятывы, фактычна падае размалёўванне козаў як незвычайны атракцыён.

Сама аграсядзіба «Дары матулі» на момант падрыхтоўкі артыкула пакуль не дала публічнага каментара наконт гэтай сітуацыі ў сваіх сацсетках.

Чытайце таксама: «Была ў сапраўдным шоку». Беларуска раскрытыкавала ўмовы для жывёл у Мінскім заапарку — у Threads разгарэлася спрэчка