Выпускнікоў БДМУ размеркавалі на адпрацоўку: яны не стрымалі эмоцый

17 лютага ў выпускнікоў Беларускага дзяржаўнага медыцынскага ўніверсітэта адбылося планавае размеркаванне на адпрацоўку. Многія маладыя медыкі выказвалі жаданне атрымаць накіраванне менавіта ў сталічныя паліклінікі і бальніцы. Аднак «пашанцавала» далёка не ўсім.

Чытайце таксама: У паліклініцы Оршы — вялікія чэргі на аналізы крыві

Відэа з рэакцыямі — да і пасля агучвання рашэнняў — многія выпускнікі выклалі ў TikTok. Ролікі хутка разышліся і выклікалі актыўнае абмеркаванне сярод беларусаў. Асабліва — у жыхароў рэгіёнаў і іншых абласных цэнтраў, дзе, паводле словаў саміх людзей, востра не хапае спецыялістаў.

@lyntik_7 #распределение#2026 ♬ оригинальный звук — Lyntik_7

У беларускім сегменце TikTok з’явілася процьма відэа, у якіх выпускнікі мінскага медуніверсітэта паказваюць свае эмоцыі да і пасля размеркавання. Адна з выпускніц жартам назвала гэты працэс чарговымі «галоднымі гульнямі».

@doramka_custom #распределение2026 #распределениебгму #распред #бгму ♬ оригинальный звук — Дорамка

На многіх роліках відаць, як тыя, хто атрымаў накіраванне ў мінскія паліклінікі і бальніцы, шчыра радуюцца. І наадварот — сумныя вочы ў тых, каго размеркавалі не туды, куды яны планавалі. Дзеля справядлівасці варта адзначыць і тых, хто паставіўся да накіравання ў іншыя гарады — Магілёў, Салігорск, Маладзечна, Мар’іну Горку — спакойна, нават з усмешкай. Але такіх на відэа было прыкметна менш.

Чытайце таксама: «Гэта толькі пачатак квэста»: У паліклініцы Мар’інай горкі вялікія чэргі

Што абмяркоўвалі беларусы ў каментарах

Пад тэматычнымі ролікамі беларусы выказвалі розныя меркаванні. Хтосьці шчыра парадаваўся за маладых медыкаў, а хтосьці здзівіўся, што практычна ўсе на відэа імкнуцца менавіта ў Мінск, а не ў іншыя гарады.

• «А як жа іншыя гарады? Усе ў Мінск хочуць», — пішуць карыстальнікі.
• «Мінчан пакідаюць у Менску. Астатнім — дарога на радзіму», — адзначаюць іншыя.
• «А ў абласцях хто працаваць будзе?» — задаюцца пытаннем у каментарах.

Паводле словаў карыстальнікаў TikTok, медыкаў вельмі не хапае як у абласных цэнтрах, так і ў невялікіх населеных пунктах. Жыхарка Брэсцкай вобласці звярнула ўвагу на сітуацыю ў сваім рэгіёне: «У нас у Целяханах Івацэвіцкага раёна патрэбны гінеколаг».

Іншыя людзі актыўна запрашалі маладых медыкаў да сябе ў гарады:

• «Вельмі чакаем у Баранавічах, нам вельмі не хапае тэрапеўтаў».
• «Барысаў, чакаем вас у “хуткай”».
• «Прыязджайце ў Астравец».

Што адбываецца з медыцынай у рэгіёнах

Як вынікае з каментароў, у рэгіёнах бракуе спецыялістаў розных профіляў — ад тэрапеўтаў да вузкіх спецыялістаў. Гэта пацвярджае і сумная тэндэнцыя апошніх гадоў: у раённых цэнтрах закрываюцца радзільныя дамы і часам рэнтгенаўскія кабінеты. А ў працуючых гарадскіх паліклініках заўважаюць вялікія чэргі на аналізы, якія, па словах мясцовых жыхароў, адбываюцца праз недахоп спецыялістаў.

BGmedia ўжо звяртала ўвагу на сітуацыю з радзільнямі ў розных гарадах. Так, у Слуцку летась стала вядома пра закрыццё адзінай радзільні. Раней там абслугоўвалі не толькі жыхарак горада, але і жанчын з навакольных вёсак і суседніх населеных пунктаў. Падобныя сітуацыі назіраюцца ў Калінкавічах, Вілейцы, Глыбокім, Докшыцах, Хойніках, Пружанах і Ганцавічах. У выніку цяжарным даводзіцца ехаць у суседнія гарады — за дзясяткі кіламетраў ад дому.

Гісторыя з размеркаваннем маладых медыкаў яшчэ раз падкрэслівае даўнюю праблему айчыннай медыцыны: пакуль выпускнікі мараць пра сталіцу праз добрыя заробкі і перспектывы, рэгіёны чакаюць хаця б мінімальнага папаўнення кадраў у мясцовых медыцынскіх установах.

Чытайце таксама:  Закрыццё радзільных дамоў — новая тэндэнцыя ў беларускіх райцэнтрах: што адбываецца ў Камянцы?