Жанчына з Брэста падзялілася пазнакай у сваёй медкартцы. Урачам гэта не спадабалася

Беларуская блогерка Наталля падзялілася сваёй гісторыяй у сацсетках, і гэтым выклікала шмат спрэчак.

Чытайце таксама: «Как жить за такие деньги?»: водитель скорой из Бреста показал расчетки и рассказал, почему не может уволиться

Аднойчы жанчыне давялося звярнуцца на гарачую лінію Міністэрства аховы здароўя па асабістых пытаннях. Пазней, наведваючы гарадскую бальніцу ў Брэсце, яна заўважыла чырвоную пазнаку на сваёй медыцынскай картцы. Наталля патлумачыла, што такая пазнака звычайна азначае неабходнасць асаблівай уважлівасці і акуратнага ўзаемадзеяння з пацыентам.

Сваёй гісторыяй Наталля падзялілася ў Reels Instagram, і яна выклікала бурную рэакцыю ў каментарах. Пад ролікам таксама адзначылася шмат беларускіх медыкаў, якія працуюць у сістэме аховы здароўя. Сітуацыя добра адлюстроўвае напружанне паміж пацыентамі і ўрачамі.

Пазіцыя медыкаў: «У пацыентаў надта спажывецкае стаўленне да ўрачэй»

Відэа трапіла да аўдыторыі беларускіх медыкаў. Амаль ніхто з каментатараў не пацікавіўся прычынай скаргі, аднак з’явіліся пытанні да самога відэароліка і яго аўтаркі.

Некаторыя медыкі палічылі скаргу жанчыны недарэчнай, спасылаючыся на свой досвед, калі яны сутыкаліся з неўдзячнымі пацыентамі, якія скардзяцца нават на дробязі. Для іх гэты выпадак не стаў выключэннем.

Іншыя ж пакпілі з рашэння жанчыны паскардзіцца, палічыўшы, што так робяць толькі тыя, хто проста любіць «качаць правы». А чырвоную пазнаку ў амбулаторнай картцы многія палічылі сумнеўнай падставай для гонару.

• «Ніхто ўсур’ёз не ўспрымае вашыя скаргі ў Мінздароўя. Мы толькі смяемся з вас».
• «Трэба адмяніць бясплатную медыцыну, і тады не будзе праблемаў ні ў пацыентаў, ні ў лекараў».
• «Усім да халеры на вашыя скаргі! А ў картцы так пазначаюць псіхічна-хворых людзей, якіх трэба абыходзіць бокам».
• «Трэба да пацентаў ставіцца так жа па-хамску, як і яны да ўрачоў».

Чытайце таксама: Пациентке спелеолечебницы в Солигорске пригрозили милицией из-за жалоб в TikTok

Аднак знайшліся і медыкі, якія лічаць, што ў скаргах няма нічога дрэннага, бо ўрачы самі абралі такую складаную прафесію:

«Як медык заявляю: мы самі выбралі прафесію, самі шмат гадоў вучыліся, самі выбралі працу ў дзяржаўнай установе, таму ставіцца да людзей трэба як да ЛЮДЗЕЙ. Прафесія “чалавек-чалавек” ніколі не будзе лёгкай, запомніце. Я заўсёды стаўлюся да пацыентаў спакойна і з разуменнем, няхай гэта «канфліктны» чалавек ці не. Мы разумеем, што ў аналізах няма нічога страшнага, але людзі без медыцынскай адукацыі могуць гэтага не зразумець і хвалююцца за сваё здароўе з-за аднаго павышанага паказчыка. І гэта цалкам нармальна. Магчыма, яны працуюць у сферах, у якіх мы не моцныя, і мы таксама прыходзім да іх «па дробязі». Будзьце больш добразычлівымі і разумнымі. І памятайце, што свет цесны».

Пазіцыя пацыентаў: «Скаргі не з’яўляюцца на роўным месцы»

Шматлікія людзі, якія пабачылі каментары, моцна здзівіліся меркаванням урачоў. Многія падзяліліся сваімі гісторыямі, дзе сутыкнуліся з непаважлівым стаўленнем лекараў у бальніцах. Але больш за тое: на меркаванне людзей, скаргі не ўзнікаюць на пустым месцы, а гісторыі, дзе пацыенты скардзяцца на дробязі, перабольшаныя, бо існуе нашмат больш выпадкаў знявагі, пра якія прынята маўчаць, бо «ўрачы — святое».

У спрэчках з урачом, які спытаў, ці сапраўды людзі вераць, што пасля скаргаў да іх будуць ставіцца лепш, многія адказалі, што ў гэтым ёсць сэнс.

• «Я ведаю, што, паскардзіўшыся і ўчыніўшы скандал, можна перасунуць дыягнастычнае МРТ для анкалагічнага пацыента на месяц. А калі ў вас метастазы ў мозгу, гэта, ведаеце, цэлае жыццё».
• «Так, скардзіцца ёсць сэнс. Бо тады будуць дзейнічаць у рамках закона».
• «Ды ўсё адно, як яны будуць размаўляць — галоўнае, каб сумленна выконвалі свае абавязкі. У мяне дзядзька паміраў ад раку. Сапраўды паміраў. Яму неабходна было ўводзіць морфій, каб зняць болі. І гэтыя “недаўрачы” не хацелі ездзіць і рабіць уколы. Цётка патэлефанавала ў Мінздароўя — і адразу ўсе ўсё “захацелі”. І ўвогуле не мае значэння, з якімі тварамі ці думкамі яны гэта рабілі. Галоўнае, што паміраючаму чалавеку не было балюча».

Чырвоная пазнака як лайфхак для пацыентаў

Некаторыя беларусы палічылі інфармацыю з відэа карыснай, бо пасля яго прагляду ў іх узнікла ідэя зрабіць сабе такую ж пазнаку, каб пазбегнуць грубасці і зняважлівага стаўлення з боку ўрачоў.

• «То бок я магу чырвонай асадкай зрабіць сабе такую ж пазнаку ў картцы, і тады са мной будуць нармальна камунікаваць, як і належыць?».
• «Атрымоўваецца, што для таго, каб табе не хамілі, трэба ў сваёй амбулаторнай картцы абвесці пазнаку?».
  
  Чытайце таксама: Скандал в Могилеве: кондуктор выгнала школьника из троллейбуса, руководство встало на ее сторону