«Хто даў загад высекчы ўсе дрэвы?»: жыхарка Слуцкага раёна заявіла пра магчымую высечку бярозавага парку — ёй адказалі

Жыхарка Слуцкага раёна апублікавала ў Threads допіс, у якім паведаміла пра магчымую высечку бярозавага парку ў вёсцы Танежыцы. Да сваёй публікацыі яна дадала відэа і фатаграфіі, на якіх паказала работы, што адбываюцца на месцы.

Чытайце таксама: У Слуцку вырубілі дрэвы каля прыпынку. Жыхары пытаюцца: «Навошта пазбавілі людзей ценю?»

Паводле жанчыны, гаворка ідзе пра парк, які каля 30 гадоў таму быў высаджаны на месцы былой сельскай звалкі.

«Добры чалавек сваімі рукамі прыбраў сметнік і пасадзіў дрэвы»

Жанчына распавяла, што парк з’явіўся дзякуючы намаганням мясцовага жыхара.

«Парк, які быў пасаджаны 30 гадоў таму на месцы сельскай звалкі. Добры чалавек сваімі рукамі прыбраў сметнік і пасадзіў дрэвы на радасць вяскоўцам», — напісала яна.

Паводле яе словаў, вечарам напярэдадні ў вёску прыехалі трое мужчын і пачалі спілоўваць здаровыя бярозы:

«Учора каля васьмі гадзін вечара прыехалі трое мужчын і павалілі большасць здаровых моцных бяроз на ўчастку, дзе няма ворных зямель, а дрэвы нікому не заміналі».

 

View on Threads

 

Жанчына сцвярджае, што падышла да рабочых і спытала, чаму яны спілоўваюць здаровыя дрэвы. У адказ, як кажа жанчына, яны паведамілі, што дзейнічаюць па распараджэнні кіраўніцтва: «Сказалі, што такую задачу паставіла кіраўніцтва — высекчы ўсе дрэвы. Але пачалі менавіта з самых моцных бяроз у сярэдзіне парку».

Дрэвы вывозяць праз дарогу

Асобнае здзіўленне ў жанчыны выклікала тое, што, паводле яе назіранняў, спілаваныя дрэвы вывозяць у прыватнае падвор’е праз дарогу.

Яна звяртае ўвагу на тое, што парк не знаходзіцца каля праезнай часткі, дрэвы былі здаровыя, а само месца выкарыстоўвалася мясцовымі жыхарамі для адпачынку.

«Гэта быў куток кіслароду, куды людзі прыходзілі адпачыць, збіралі грыбы і бярозавы сок. Цяпер трэск бяроз чуваць па ўсёй вёсцы. Каму спатрэбіліся гэтыя бярозы? Чаму іх вывозяць у прыватнае падвор’е? Хто даў распараджэнне расправіцца з безабароннымі дрэвамі?» — піша аўтарка.

Яна таксама паведаміла, што спрабавала звязацца з сельскім саветам, аднак зрабіць гэта не ўдалося, бо былі выхадныя: «Тэлефанавала ў сельсавет — у іх выхадныя. Куды яшчэ тэлефанаваць і як высветліць, што адбываецца, не ведаю. За выходныя могуць высекчы ўсе дрэвы».

Паводле словаў аўтаркі публікацыі, пасля таго як гісторыя атрымала розгалас, на месца прыехалі супрацоўнікі міліцыі. 26 чэрвеня жанчына паведаміла, што яны зафіксавалі факт высечкі дрэў і паведамілі, што накіруюць матэрыялы ў органы аховы прыроды, якія будуць ацэньваць сітуацыю і вырашаць, ці былі дапушчаныя парушэнні.

 

View on Threads

 

Таксама, паводле яе слоў, высветлілася, што ў арганізатараў работ нібыта ёсць дазвол на «добраўпарадкаванне тэрыторыі». Цяпер, як сцвярджае беларуска, кампетэнтныя службы павінны праверыць, ці адпавядалі праведзеныя работы выдадзенаму дазволу.

Вось як на сітуацыю адрэагавалі беларусы

У каментарыях многія карыстальнікі выказалі занепакоенасць і прывялі падобныя выпадкі са сваіх рэгіёнаў.

Некаторыя адзначылі, што нават на ўласным участку без дазволу нельга проста так спілаваць бярозу.

• «Сем гадоў таму ў Лідскім раёне аштрафавалі суседа маёй цёткі за незаконную высечку бярозы, якую ён сам пасадзіў на сваім участку. Мы ўсе былі ў шоку. Нам тады патлумачылі, што бярозы чапаць нельга. Тут нешта выглядае і незаконна, і бесчалавечна».

Іншыя распавялі, што нават камунальныя службы падчас абрэзкі імкнуцца не пашкодзіць такія дрэвы.

• «У нас у двары, калі Зелянгас абразаў дрэвы, у бяроз толькі бакавыя галінкі падрэзалі. Я спытала чаму. Мне адказалі, што бярозы ўвогуле нельга спілоўваць — толькі абрэзаць галінкі, якія замінаюць».

Яшчэ адзін карыстальнік прывёў прыклад са сваёй вёскі, дзе, паводле яго слоў, таксама нечакана пачалі знішчаць стары парк.

• «У нас каля царквы спілавалі сем здаровых векавых дубоў. Усё вельмі хутка распілавалі і вывезлі. Дыяметр аднаго дуба быў больш за метр. Прыязджалі нейкія людзі ў гальштуках — відаць, яны і вырашылі лёс дрэў. Цяпер хочуць высекчы парк, якому каля 80 гадоў. Мы ўсёй вёскай збіраем подпісы, але мясцовае кіраўніцтва кажа, што нібыта нічога пра гэта не ведае».

Знайшліся і тыя карыстальнікі, што параілі звяртацца ў міліцыю ці Мінпрыроды. А астатнія — не стрымліваліся ў эмоцыях:

• «Ахова прыроды можа? Міліцыя? У прыватны падворак — як быццам бы проста крадуць дрэвы».
• «Там зверху ўсё дазволена, будзе зноў звалка».
• «Які жах! Нават калі высветліцца, што рубілі без дакументаў, дрэвы назад не вярнуць».

Што стала вядома на сёння

27 ліпеня ў гісторыі з’явіліся новыя падрабязнасці. Як паведамілі мясцовыя медыя, журналісты «SlutskGorod» паразмаўлялі з адным з мужчын, якія трапілі на відэа з вырубкай. Паводле ягоных слоў, перад пачаткам работ ён звярнуўся ў Рачковіцкі сельвыканкам і атрымаў узгадненне на добраўпарадкаванне тэрыторыі.

Мужчына сцвярджае, што разам з сям’ёй вырашыў навесці парадак каля свайго дома, бо ўчастак за гады ператварыўся ў стыхійнае сметнішча: туды звозілі бытавыя адходы, выкідвалі мёртвую хатнюю птушку, а за некалькі дзён да пачатку работ, паводле яго слоў, сярод смецця нават знайшлі мёртвую лісу.

Спачатку сям’я вывезла смецце, пасля чаго пачала прыбіраць дрэвы і хмызняк, якія, як сцвярджае мужчына, перашкаджалі праезду і добраўпарадкаванню тэрыторыі. Ён таксама заявіў, што спілоўваліся толькі пашкоджаныя і хворыя дрэвы, а пасля завяршэння работ плануецца высадзіць новыя бярозы і ўладкаваць месца для адпачынку. У Рачковіцкім сельвыканкаме журналістам паведамілі, што гэты ўчастак афіцыйна не мае статусу парку і з цягам часу зноў ператварыўся ў несанкцыянаваную смеццевую звалку.

Чытайце таксама: У Браславе пасля скаргаў на спілаваныя ліпы ўлады паабяцалі высадзіць новыя. Такое адбываецца не ўпершыню