«Рака ўжо зарастае на вачах». Случчане зноў б’юць трывогу праз стан Случы, гэтым разам — каля гарадскога пляжа

Жыхары Слуцка зноў звярнулі ўвагу на стан ракі Случ. Пасля нядаўніх скаргаў на зарастанне вадаёма ў раёне вуліцы Вечаркевіча ў сацсетках з’явілася новае відэа. На гэты раз случчане паказалі ўчастак каля адзінага гарадскога пляжа ў мікрараёне 11-га гарадка.

Чытайце таксама: Чаму Случ у Слуцку ўсё больш зарастае? Мясцовыя жыхары баяцца, што рака можа ператварыцца ў балота

На кадрах відаць, што значная частка паверхні ракі пакрытая воднай расліннасцю, а ўздоўж берага разрасліся густыя зараснікі чароту. Побач знаходзіцца зона для купання, аднак аўтар відэа адзначае, што і гэты ўчастак, на яго думку, ужо патрабуе расчышчэння.

Праблема, пра якую гавораць не ўпершыню

Гэта ўжо не першая скарга жыхароў на стан Случы. Раней случчанка распавядала, што ў раёне вуліцы Вечаркевіча рака «патроху ператвараецца ў балота».

«Рачулка патроху ператвараецца ў балота. Узімку, калі лёд быў трывалым, мы нават самі спрабавалі крыху расчысціць, але, на маю думку, усё трэба прыбіраць разам з каранямі. Мы даведваліся, колькі будзе каштаваць зрабіць гэта сваімі сіламі хаця б на нашай вуліцы — атрымліваецца вельмі дорага. Набярэжную яшчэ крыху падтрымліваем самі. Праз зараснікі ўжо нават плыні не відаць», — распавяла яна.

Раней BGmedia таксама паведамляла пра скаргі жыхароў вёскі Працэвічы Слуцкага раёна на забруджванне старарэчча Случы. Пасля праверак Слуцкая раённая інспекцыя прыродных рэсурсаў пацвердзіла перавышэнне дапушчальных канцэнтрацый шэрагу забруджвальных рэчываў.

Асноўнай прычынай праблемы назвалі моцна зношаныя ачышчальныя збудаванні, пабудаваныя яшчэ ў 1970-х гадах. Паводле дзяржаўных СМІ, іх рэканструкцыю плануюць завяршыць толькі да 2029 года ў межах праграмы «Камфортнае жыллё і спрыяльнае асяроддзе».

Што пішуць случчане

Пад новым відэа жыхары адзначаюць, што праблема ўжо даўно выйшла за межы аднаго ўчастка ракі:

«Рака і ў раёне Чортавага маста — бруднае балота!», — піша адна случчанка. «Там зверху траву зрэзалі, яна і сабралася каля дамбы. Яе прыбраць бы, але як? З лодкі граблямі? Замучаешся», — адказалі ёй. «Сёння ўбачыла — жахнулася. Шкада стала раку», — дзеліцца яна.

У папярэдніх абмеркаваннях случчане таксама звярталі ўвагу, што Случ зарастае і ў іншых месцах горада.

• «Усім абыякава. Набярэжную скосяць, а гэтыя лапухі проста пускаюць па плыні. За медвучылішчам там увогуле не прайсці — усё зарасло».
• «У раёне Навадворцаў рака хутка ператворыцца ў ручай — таксама моцна зарасла, плыні амаль няма».
• «Пасля меліярацыі амаль знішчылі многія рэкі, а дробныя і зусім зніклі. Цяпер трэба зноў забалочваць тэрыторыі, інакш засухі будуць толькі часцейшымі».

Чытайце таксама: «Хто даў загад высекчы ўсе дрэвы?»: жыхарка Слуцкага раёна заявіла пра магчымую высечку бярозавага парку — ёй адказалі