У Калінкавічах хочуць ператварыць парк культуры ў зону ваеннай памяці. Жыхары чакалі атракцыёнаў, а не танкаў

Незалежнае выданне «Флагшток» звярнула ўвагу на планы ўладаў Калінкавічаў змяніць канцэпцыю гарадскога парку культуры і адпачынку. Паводле апублікаваных матэрыялаў грамадскага абмеркавання, у парк прапануюць перанесці танк Т-34, які цяпер знаходзіцца ў цэнтры горада, а таксама стварыць там цэлую экспазіцыю ваеннай тэхнікі.

Чытайце таксама: Ці вартая падрыхтоўка да «Дажынак» высечкі дрэў? Што адбываецца ў Калінкавічах і чаму жыхары незадаволеныя

Грамадскія абмеркаванні праекта будуць праходзіць з 27 ліпеня па 11 жніўня.

Тлумачэнні гарадскіх уладаў

У райвыканкаме тлумачаць неабходнасць пераносу тым, што сённяшняе размяшчэнне помніка нібыта стварае праблемы для бяспечнага доступу праз інтэнсіўны рух транспарту.

Акрамя таго, чыноўнікі заяўляюць, што новая лакацыя будзе больш зручнай для правядзення дзяржаўных і патрыятычных мерапрыемстваў.

Аднак, як адзначае «Флагшток», гэты аргумент выглядае спрэчна. Сам танк знаходзіцца ў невялікім скверы на скрыжаванні вуліц Карла Маркса і Фрунзэ, а падысці да яго можна праз арганізаваныя пешаходныя пераходы.

У апублікаваным абгрунтаванні таксама адзначаецца, што сённяшняя лакацыя «істотна абмяжоўвае магчымасць бяспечнага і камфортнага размяшчэння ўдзельнікаў урачыстых мітынгаў у дні дзяржаўных свят і памятных дат».

Фактычна ўлады прапануюць ператварыць парк культуры і адпачынку ў прастору, прысвечаную ваеннай гісторыі.

Жыхары чакалі іншага

Як заўважыла BGmedia, у сацыяльных сетках многія жыхары Калінкавічаў успрынялі гэтую ідэю без асаблівага энтузіязму.

@ala_veka Город преображается к дожинкам. И в нашем парке — новые изменения. Старый вход в парк демонтирован, теперь уже на входе — новый вайб, на мой взгляд, так гораздо современнее . А вы как думаете? #калинковичи #город #ремонт #парк #лето ♬ оригинальный звук — music23.

Людзі адзначаюць, што пасля рэканструкцыі чакалі з’яўлення новых атракцыёнаў, дзіцячых пляцовак і большай колькасці зялёных зон, а не яшчэ адной лакацыі з ваеннай тэхнікай.

Многія таксама нагадалі пра нядаўнія высечкі дрэў у горадзе і лічаць, што парк паступова губляе сваю галоўную функцыю — быць месцам адпачынку.

У каментарах карыстальнікі пішуць, што ў горадзе ўсё менш утульнасці, а замест новых дрэў і каруселяў з’яўляюцца новыя мемарыяльныя аб’екты. Некаторыя шкадуюць пра вырубленыя дрэвы, якія давалі цень у спякотныя дні, іншыя задаюцца пытаннем, ці будуць пасля рэканструкцыі ў парку наогул дзіцячыя атракцыёны.

Частка жыхароў адзначае, што Калінкавічы калісьці ўспрымаліся як невялікі зялёны і ўтульны горад, але цяпер, на іх думку, пасля маштабнага добраўпарадкавання ён усё больш губляе сваю ранейшую атмасферу.

Чытайце таксама: На Брэстчыне маглі заасфальтаваць унікальную трылінку, якая захавалася з 1930-х гадоў