«Зграі гаспадараць на вуліцах». У Краснаполлі скардзяцца на праблему з бадзяжнымі сабакамі

Жыхары Краснаполля Магілёўскай вобласці ўжо некалькі месяцаў скардзяцца на зграі бадзяжных сабак, якія свабодна блукаюць па вуліцах райцэнтра. Паводле іх слоў, камунальныя службы пакуль не змаглі вырашыць праблему.

Чытайце таксама: Валанцёры паскардзіліся на стаўленне да жывёлаў у дзяржпрадпрыемстве «Фаўна горада»

Пра гэта пісала мясцовая раённая газета «Чырвоны сцяг», звярнула ўвагу «Магілёў.медыя». Яшчэ ў снежні 2025 года журналісты паведамлялі, што здзічэлыя сабакі палохаюць жыхароў сваім выглядам. Аднак справа не толькі ў гэтым: фіксаваліся выпадкі, калі жывёлы кідаліся на мінакоў.

Тады журналісты адзначалі, што неаднаразова звярталіся з просьбай вырашыць праблему ў УВКП «Жылкамунгас».

«Нам адказвалі, што спецыялізаваную службу яны выклікаюць за свае сродкі, а для гэтага трэба толькі звярнуцца з пісьмовай заявай», — адзначалася ў артыкуле.

Пры гэтым, паводле раёнкі, ужо былі выпадкі, калі служба адлову прыязджала ў раён, але не знаходзіла бадзяжных сабак і з’язджала, так і не выканаўшы сваю працу.

Прайшло некалькі месяцаў, але сітуацыя не змянілася

З таго часу прайшло некалькі месяцаў, але сітуацыя, паводле паведамленняў мясцовай газеты, істотна не змянілася. У сакавіку 2026 года журналісты зноў паднялі гэтую тэму.

«Групоўкі, інакш не скажаш, чатырохногіх сяброў чалавека акупавалі вуліцы і двары. Прычым паводзяць яны сябе не як госці, а як паўнапраўныя ўладальнікі: адпачываюць каля ўваходаў у крамы, ладзяць шумныя “разборкі” і з цікавасцю даследуюць змесціва смеццевых бакаў», — піша «Чырвоны сцяг».

Нават журналісты дзяржаўнага выдання адзначаюць, што схема «заява — грошы — адлоў» працуе не так, як павінна. Паводле іх назіранняў, спецыялізаваныя службы прыязджаюць у Краснаполле, аглядаюць тэрыторыю і з’язджаюць без выніку.

«Ці то сабакі ў нас занадта хітрыя і валодаюць навыкамі маскіроўкі, ці то прафесіяналы глядзяць не ў тыя двары. У выніку: грошы УВКП «Жылкамунгас» асвоеныя, справаздачы напісаныя, а зграі як сядзелі ў цэнтры, так і сядзяць», — канстатуе выданне.

Падобныя скаргі ёсць і ў іншых гарадах

Праблема з бяздомнымі жывёламі адзначаецца і ў іншых населеных пунктах. Напрыклад, жыхары пасёлка Азёрны пад Жыткавічамі раней скардзіліся на вялікую зграю сабак, якая свабодна гуляла па вуліцах.

Паводле мясцовых жыхароў, у ёй было каля дзясятка буйных жывёл. Людзі патрабавалі ад уладаў прыняць меры, каб забяспечыць бяспеку дзяцей і дарослых.

Гэтая гісторыя выклікала шырокую дыскусію ў сацыяльных сетках. Частка карыстальнікаў адзначала, што праблема ўзнікае не толькі з-за саміх сабак, але і з-за безадказных гаспадароў, якія выкідваюць жывёл на вуліцу.

Іншыя звярталі ўвагу на недахоп прытулкаў для бяздомных жывёл і слабую працу мясцовых уладаў у гэтай сферы.

У Беларусі не хапае прытулкаў для жывёл

Сістэма дзяржаўных прытулкаў для жывёл у Беларусі развіта вельмі слаба. Большасць арганізацый, якія дапамагаюць бяздомным сабакам і катам, створана валанцёрамі.

Сярод вядомых ініцыятыў — мінскі праект «Суперкот» і цэнтр дапамогі жывёлам «Дабрыня» ў Брэсце. У Гомельскай вобласці дзейнічаюць толькі невялікія валанцёрскія групы, якія маюць абмежаваныя магчымасці.

Асабліва складанай сітуацыя становіцца зімой. Праз холад і адсутнасць прытулкаў жывёлы вымушаныя шукаць ежу і сховішча каля жылых дамоў.

Пры гэтым людзі, якія спрабуюць падкормліваць бяздомных жывёл, часам рызыкуюць атрымаць штраф, калі іх дзеянні палічаць парушэннем санітарных правілаў.

Читайте также: «Колькі можна вывозіць свае вусатыя абавязкі ў вёску?». Беларуска звярнула ўвагу на праблему бяздомных жывёлаў