«Не хвалюйцеся, так амаль усюды». Жыхары Барысава зноў скардзяцца на зарослыя травой двары

У адным з барысаўскіх паблікаў апублікавалі допiс пра нескошаную траву. На гэты раз увагу жыхароў прыцягнуў двор каля дома №33 на вуліцы Дняпроўскай. Аўтар публікацыі напісаў коратка: камунальнікі зноў забыліся пра траву.

Чытайце таксама: Жыхары Слоніма паскардзіліся на няскошаную траву і закінутую дзіцячую пляцоўку. Адказ райвыканкама здзівіў

Барысаўцы лічаць, што камунальныя службы нікуды не спяшаюцца

Мяркуючы па каментарыях, праблема аказалася знаёмай не толькі жыхарам аднаго двара. Можна скласці пералік адрасоў і раёнаў, дзе людзі таксама незадаволеныя станам зялёных зон:

• «Так паўсюль у Барысаве гэтая праблема. Традыцыйна кожнае лета. Аграгарадок Лошніца — скасілі каля дома жыхары. На гэтым усё. Не тое што адказу на пытанне, чаму не скошана, няма… Няма нават саміх супрацоўнікаў на месцы!»
• «Не толькі па Дняпроўскай, на Чалоўскай таксама хутка трава будзе ростам з чалавека!»
• «Таксама, як на Ватуціна, 22А».

У сетцы кожны ваш клік пакідае след, які могуць выкарыстоўваць супраць вас. Не дазваляйце ператвараць вашыя інтарэсы ў крымінальныя справы. Уключайце BGlobal VPN — будзьце нябачныя для старонніх вачэй.

Спасылка на падключэнне BGlobal VPN – тут

Барысаўцы лічаць, што камунальныя службы нікуды не спяшаюцца:

• «Яны толькі каля прыватнага сектара могуць бачыць, што трава па калена, а тое, што ў горадзе робіцца, усім усё адно».
• «А чаму вы лічыце, што забыліся? Яны і не ўспаміналі, падобна».
• «Не хвалюйцеся, так амаль усюды».
• «Ды пакасілі б хоць па метры каля тратуараў, дзіцячыя пляцоўкі і футбольныя палі. Лета ўсё ж такі, дзеці на канікулах, хлопцы выходзяць гуляць у футбол, а палі зарослыя. Энка ўвогуле не косіцца і не падмятаецца. Самі добраўпарадкоўваем, самі смецце збіраем. Калі навядуць улады парадак у гэтай службе — незразумела».

Некаторыя каментатары жартуюць, што горад паступова ператвараецца ў дэкарацыі для перадачы пра дзікую прыроду: «Гэта дэкарацыі джунгляў для новых выпускаў «У свеце жывёл»? А калі сур’ёзна, выглядае кепска і нязручна. Як там прабірацца праз гэтыя нетры?»

Асабліва эмацыйна жыхары адрэагавалі на розніцу ў патрабаваннях да камунальных службаў і звычайных грамадзян: «Падвойныя стандарты: як прыватнае падвор’е — дык штраф, як камунальнікі запускаюць — дык нікога не штрафуюць».

Чытайце таксама: «Трава вышэй за лаўкі»: жыхары Слуцка скардзяцца на зарослы двор, а заяўкі праз 115 закрываюць

У першую чаргу косяць участкі ўздоўж дарог, пешаходных дарожак, дзіцячых пляцовак і прыдамавых тэрыторый

Такое незадавальненне выглядае асабліва паказальным на фоне публікацый раённай газеты «Адзінства». Яшчэ ў маі выданне нагадвала, што пакос травы — абавязковая працэдура добраўпарадкавання, а таксама звяртала ўвагу на новыя правілы, згодна з якімі ўладальнікі прыватных участкаў абавязаныя касіць траву пры вышыні больш за 20 сантыметраў.

Газета рэгулярна распавядае і пра працу камунальнікаў. На пачатку чэрвеня пасля скаргі на зарослую тэрыторыю каля азёр у Залінейным раёне журналісты звязаліся з УП «Жыллё». Там паведамілі, што ў першую чаргу косяць участкі ўздоўж дарог, пешаходных дарожак, дзіцячых пляцовак і прыдамавых тэрыторый, а спрэчную тэрыторыю абяцалі прывесці ў парадак да 20 чэрвеня.

16 чэрвеня «Адзінства» таксама публікавала фота пакосу травы ў раёне Алеі Маці, адзначаючы, што камунальнікі актыўна змагаюцца з расліннасцю, якая хутка расце.

Мяркуючы па допiсах у гарадскіх пабліках, многія жыхары пакуль не адчуваюць вынікаў гэтай працы. Прынамсі, мяркуючы па колькасці адрасоў, якія барысаўцы пачалі пералічваць пад адным кароткім паведамленнем пра зарослы двор, праблема высокай травы ў горадзе па-ранейшаму застаецца адной з самых абмяркоўваемых тэм кожнага лета.

Чытайце таксама: Бабруйчанка паказала ў TikTok, як у траве ў двары дома можна гуляць у хованкі. Здагадайцеся, што было далей